Майатааҕы “Чуораанчык” дьааһыла-садка биэс бөлөҕүнэн 143 оҕо сылдьар. Сэбиэдиссэй Ольга Анатольевна Осипова, уйулҕа исписэлииһэ Ньургуйаана Анатольевна Тарская, старшай иитээччи Лидия Александровна Михайлова салайааччылардаах оҕону сайыннарар кииҥҥэ уон иитээччи, тоҕус иитээччи көмөлөһөөччүлэрэ, үҥкүү, муусука, физическэй култуура салайааччылара, итиэннэ медик, логопед үлэлииллэр.
Быйыл үөрэҕирии эйгэтигэр Арассыыйаҕа уонна Мэҥэ Хаҥалас улууһугар оскуола иннинээҕи үөрэхтээһин 100 сыла. Бу чэрчитинэн, оҕону сайыннарар кииннэргэ алтынньы 15 күнүттэн сэтинньи 15 күнүгэр диэри үлэһиттэр, төрөппүттэр уонна оҕолор кыттыылаах тэрээһиннэр ыытылла тураллар.
“Чуораанчык” уһуйааҥҥа “Чэгиэн өй-санаа” ыйа биллэриллэн, түөрт блокка араарыллан, сэттиэлэ күннэринэн өй-санаа сааһылааһыныгар дириҥ ис хоһоонноох тэрээһиннэр буола тураллар. Ааспыт сэттиэлэҕэ өҥнөрүнэн таҥныбыттара. Бу киэҥ ис хоһоонноох сэттиэлэ аан күнүгэр бары үөрүүнү, сырдыгы, күнү көрдөрөр саһархай өҥнөөх таҥаһы таҥнан кэллилэр. Үлэһиттэр махтал тылларын саһархай сэбирдэххэ суруйан бэйэ-бэйэлэрин эҕэрдэлэстилэр. Оҕолорго иитээччилэр бөлөхтөрүн иһигэр бэйэлэрин саастарыгар сөптөөх тэрээһиннэри тэрийбиттэрэ. Ханыы күн өй-санаа бэлиэтэ халлаан күөҕэ өҥҥө ананна. Манна оҕолорго толкуйдатар-сайыннарар, үлэһиттэргэ уйулҕа тиэмэтигэр квист оонньуу ыытылыннылар. Орто күн от күөх өҥҥө ананан “ЭкоЛук” диэн аатынан ыытылынна. Бары от күөҕэ өҥнөөх таҥастаах кэллилэр. Дьиэтээҕи сорудах быһыытынан, биирдэ туттуллан баран быраҕыллар матырыйаалларынан оҥоһуктары оҥорон аҕаллылар. Чэбэр күн көхтөөх, түргэн-тарҕан буолууну көрдөрөр кыһыл өҥ күнэ буолла. Манна бөлөхтөрү барыларын хабан тэҥҥэ флешмоб ыытыллыбыта. Чөл күн фиолетовай өҥүнэн бэлиэтэннэ. Бу күн айар дьоҕурга ананан, төрөппүттэр бэйэлэрин сатабылларыгар маастар кылаастары ыытан, төрөппүттэри, үлэһиттэри, оҕолору хабан кытыннарбыттара.
Иккис сэттиэлэ “В здоровом теле – здоровый дух” диэн тиэмэҕэ ананан, челлендж ыытылла турар. Биэс күн устата үгэс буолбут биэс туһалаах дьарыктары ыытан, доруобуйаҕа анаан фоновай хаамыыны саҕалаабыттар. Оҕолор дьиэлэриттэн төрөппүттэрин кытта итиэннэ үлэһиттэр сатыы хааман уһуйааннарыгар кэлэллэр. Сэттиэлэ устата хаамыыны эбэн иһэллэр. Бу барыта видеонан, хаартысканан оҥоһуллан, оҕолор нөҥүө улахан дьоҥҥо тахсыыга, бэйэ-бэйэни көҕүлээһиҥҥэ, көхтөөх буолууга туһаайыллар. Оҕолор уһуйаантан дьиэлэригэр тиийэн төрөппүттэрин, эһэлэрин, эбэлэрин тиийэ хамсаталларыгар олук буолар. Манна хаамыыны таһынан эт-хаан сайдарыгар аналлаах “Здоровая тарелка” диэни киллэрэн, төрөппүттэр оҕолорун эт-үүт, балык, фрукта, оҕуруот астара баар аһылыгынан хааччыйаллар. Оҕо мээнэ сиэбэт астара баар буолар. Ону оҕоҕо хайдах тиэрдэргэ лайфхак ыытан, уопуттарын үллэстэллэр.
Кэлэр сэттиэлэ духуобунаска ананан ыытыллара былааннанар. Онно оҕолору кытта төрөппүттэр бэсиэдэлэри истиэхтэрэ. Салгыы мэһэйдэри, моһоллору ааһар квест оонньуулар, о.д.а. сэргэх тэрээһиннэр күүтэллэр. Бүтэһик сэттиэлэ бэйэ бэйэҕэ сыһыаҥҥа ананыа.
Алтынньы 23 күнүгэр Майа сэлиэнньэтигэр ыытыллыбыт “Таланты земли Олонхо” өрөспүүбүлүкэтээҕи куонкуруска бэлэмнэнии бөлөҕүн үс оҕолоро кыттан, үһүөн бочуоттаах миэстэлэргэ тигистилэр. Розалия Шарина салайар бөлөҕө “Хореография” анал аат 1-кы истиэпэннээх лауреатынан, Лена Бережнева уонна Сардана Жиркова салайар бөлөхтөрө “Фольклор” анал аат 1-кы уонна 2-с истиэпэннээх лауреттарынан ааттанан, кыайыы өрөгөйүн биллилэр.
Бу курдук, “Чуораанчыктар” бииртэн биир саҥа идиэйэлэри толкуйдаан, кэнчээри ыччат дэгиттэр сайдан тахсарыгар бары кыһамньыларын ууран, усулуобуйаны олохтоон, төрөөбүт тылларынан саҥардан, өбүгэ оонньууларын киллэрэн, айымньылаахтык үлэлии-хамсыы, айа-тута сылдьаллар.
Марелла Баишева.
