Амма улууһун Сатаҕай нэһилиэгэр кулун тутар 9 күнүгэр Сатаҕай, Алтан уонна Мэҥэ Хаҥалас улууһун Өлөчөй нэһилиэктэрин олохтоохторун икки ардыларыгар бильярд оонньуутугар табаарыстыы көрсүһүү тэриллэн ыытылынна.
Тэрээһиҥҥэ Сатаҕай олохтоох дьаһалтата нэһилиэккэ чөл олоҕу көҕүлээн саҥа бильярд ылан бэлэхтээбитин бэлиэтээтилэр. Күрэхтэһиини Сатаҕай нэһилиэгин баһылыгын эбээһинэһин толорооччу, бильярд федерациятын салайааччы Петр Стрекаловскай иилээн-саҕалаан ыытта, Алтан нэһилиэгин тириэньэрэ Мичил Пахомов сүрүн судьуйалаата.
Манна олохтоохтор ыалдьыттары кытта күөн көрсөн нэһилиэктэртэн 4-түү киһилээх хамаандалар кыттыбыттарын түмүгэр Гаврил Орлов 1-кы (Сатаҕай), Егор Андреев 2-с (Сатаҕай) уонна Гаврил Попов (Өлөчөй), Алгыс Новиков (Сатаҕай) 3-с миэстэ буоланнар харчынан бириистэри туттулар.
Сатаҕайдар ыҥырыылаах ыалдьыттарын итии чэйдээх сандалы тула олордон икки төгүллээн аһатан маанылаатылар-күндүлээтилэр. Успуорду өрө тутар Сатаҕай нэһилиэгэр бэтэрээн сэбиэтин бэрэссэдээтэлэ Гаврил Орлов ыҥырыыларын ылынан кэлбит хамаандаларга барҕа махтал тылларын анаата. Хардатын Өлөчөй хамаандатын салайааччы, успуорт инструктора Гаврил Попов бильярдистар ааттарыттан махтанан, үс өртүттэн үөрэн-көтөн тарҕастылар.
Дьону түмэр, кыайыыга сирдиир, чөл олоххо көҕүлүүр бильярд успуорда сайда-үүнэ туруохтун.
Марелла Баишева.
