Баартыйаларга, холбоһуктарга
Бүгүн Дьокуускай куоракка «Биир ньыгыл Арассыыйа» баартыйанан 2021 сыллаахха ылыныллыбыт Норуот тосхолун олоххо киириитин сыллаах үлэтин түмүктэринэн «Түмүк баар!» эрэгийиэннээҕи отчуоттуур-тосхоллуур пуорума ыытылла турар.
Мэҥэ Хаҥаластан улуус баһылыга Дмитрий Тихонов салайааччылаах дэлэгээссийэ кыттыыны ылар. Дэлэгээссийэ састаабыгар оройуон Сэбиэтин бэрэссэдээтэлэ Иннокентий Андросов, баартыйа олохтоох салаатын сэкирэтээрэ Айталина Сыроватская, бары нэһилиэктэр баһылыктара киирдилэр.
Күн бастакы аҥаарыгар Саха сирин араас улуустарыттан кэлбит дэлэгээссийэлэр баартыйа бырагырааматынан тутуллан үлэҕэ киллэриллибит саҥа эбийиэктэри ‒ Дьокуускайдаҕы искэни утары диспансеры, «Триумф» успуорт комплексын таһынааҕы Сайсары күөл биэрэгин, М.Е.Николаев аатынан 40 N-дээх орто оскуоланы көрдүлэр-иһиттилэр.
Эбиэттэн киэһэ алта сүрүн хайысхаларынан киэҥ ис хоһооннох төгүрүк остуоллар ыытылыннылар. Улууспут дэлэгээссийэтэ төгүрүк остуолларга баартыйа инники үлэтиггэр ылыныллыахтаах тосхоллорун тула аһаҕас кэпсэтиилэргэ киирбит этиилэри дьүүллэстилэр, санааларын үллэһиннилэр.
Киэһэ 19 чаастан пуорум пленарнай чааһа Суорун Омоллоон аатынан Опера уонна Балет тыйаатырыгар ыытыллыаҕа.
Пуорум кыттыылаахтара баартыйа биэс сыллааҕы үлэтин ырытыһан баран, чахчы да «Түмүк баар!» диэн сыанабыл биэрдилэр.
