Бүгүн, балаҕан ыйын 21 күнүгэр Саха Өрөспүүбүлүкэтин Бырабыыталыстыбатын бэрэссэдээтэлэ Кирилл Бычков биһиги оройуоммутугар Аллараа Бэстээххэ уонна Майаҕа тутуу үлэтин хаамыытын билистэ.
Үлэни-хамнаһы билсиһии Аллараа Бэстээххэ «Саха сирин тимир суоллара» тэрилтэ эбийиэктэриттэн саҕаланна. Кинини кытта Ил Түмэн дьокутаата Андрей Находкин, оройуон баһылыгын бастакы солбуйааччы Василий Михайлов, тутуу бэрэстэбиитэллэрэ сырыттылар.
Майаҕа балыыһа комплексын тутар «Адгезия» тэрилтэ үлэтин хонтуруоллуур соруктаах сырыытыгар Кирилл Евгеньевич болдьохтон тоҕо, туохтан хаалан иһэллэрин чопчуласта. Бырайыагар үгүс уларытыылар киирэннэр тутуу үлэтин атахтыыр балаһыанньаны сөбүгэр быһааран, тутууну бастакы этээһин тутан таһааралларыгар эттэ. Тутуу былаанын билистэ. Саҥа балыыһа комплексыгар биллэрин курдук дьахтар консультацията, оҕо сытан эмтэнэр отделениета, төрүүр дьиэ, реанимация салаата киириэхтээх. Билиҥҥитэ тутуу сыбаайаларын бетонунан саба кутан, сыбаайаны баайыы үлэтэ ыытыллар.
Салгыы сэттэ этээстээх элбэх кыбартыыралаах дьиэҕэ оробуочай бөлөҕү «Мэҥэ-тутуу» кэпэрэтиип салайааччыта Николай Докторов көрүстэ. Тымныы түһэ илигинэ кыбартыыраларга ититиини киллэрэргэ үлэлэһэ сылдьалларын, болдьохтон хаалыы суоҕун иһитиннэрдэ. Билиҥҥитэ манна 75 бырыһыан тутуу үлэтэ ситэриллибит. Ахсынньы 1 күнүгэр тутуу түмүктэнэригэр эрэллэрин түһэн биэрбэттэригэр Кирилл Бычков баҕа санаатын тиэртэ.
Салгыы былаан быһыытынан бырабыыталыстыба бэрэссэдээтэлэ Аллараа Бэстээххэ култуура уонна балыыһа дьиэлэрин көрдө-иһиттэ.
Марфа Птицына
