Кулун тутар 14-15 күннэригэр Майа сэлиэнньэтигэр СӨ буулдьанан ытыыга куубагын күрэхтэһиитэ буолла.
Успуорт тэрээһинэ өрөспүүбүлүкэҕэ 4 түһүмэҕинэн ыытыллар. Тохсунньу ыйтан Дьокуускай куоракка саҕаланан, салгыы уочаратынан Уус Алдан Борҕонугар, Мэҥэ Хаҥалас Майатыгар, Чурапчыга тэриллэр. Түмүктүүр чааһа сайын бэс ыйыгар Дьокуускай куоракка буолар.
Бу ураты күрэхтэһии туһунан буулдьанан ытыыга СӨ успуордун маастарыттан, оҕо-ыччат успуордун оскуолатын буулдьанан ытыыга преподаватель-тириэньэриттэн, тэрээһин кылаабынай судьуйатыттан Александр Сидоровтан билиһиннэрэригэр көрдөстүбүт:
– СӨ буулдьанан ытыыга куубагын күрэхтэһиитэ иккис сылын ыытыллар. Быйыл биһиэхэ өрөспүүбүлүкэттэн оскуола оҕолоруттан саҕалаан аҕа саастаах 70-тан тахса кыттааччы кэллэ. Күрэхтэһии усулуобуйатынан бэстилиэт уонна бинтиэпкэ көрүҥнэригэр спортсменнар 1,5 чаас устата 60 буулдьаны ытталлар. Тэрээһин оҕо-ыччат успуордун оскуолатыгар 2 күн устата ыытылынна. Кыайыылаахтары быһаарарга 1 категориялаах судьуйалар Михаил Васильев, Александр Сотников, 2-с категориялаах судьуйа Клавдия Тихонова уонна ССРС буулдьанан ытыыга успуорт маастарыгар хандьыдаата, буулдьанан ытыыга преподаватель-тириэньэр Семен Костромыкин көмөлөстүлэр, – диэн иһитиннэрдэ.
Лена Николаева, Дьокуускайдааҕы оҕо-ыччат успуордун 4 №-дээх оскуолатын буулдьанан ытыыга преподаватель-тириэньэрэ күрэххэ кыттыыларын туһунан маннык эттэ:
– Күрэхтэһии үһүс түһүмэҕэр Майа сэлиэнньэтигэр 5 иитиллээчибин аҕаллым. Бары 2-с, 3-с разрядтаахтар. Хас күрэхтэһии аайы кыттан иһэбит. Бары кыттааччыларга ситиһиилэри, эрэллээх илиини баҕарыам этэ. Ким күүстээх, ол кыайдын, – диэтэ.
Бэстилиэтинэн ытыыга дьахталларга Юлия Иванова бастаата, Айина Готовцева иккис, Сардана Габышева (бары Дьокуускайтан) үһүс миэстэ буоллулар. Эр дьоҥҥо Дьокуускайтан Тимур Никитин кыайыылаах таҕыста. Иккискэ Айхал Ковров (Чурапчы), үһүскэ Айаал Захаров (Дьокуускай) тигистилэр.
Бинтиэпкэнэн ытыыга дьахталларга бастакы миэстэни Дьокуускайтан Надежда Кривошеева, иккиһи Күннэй Эверстова (Нам), үсүһү Марина Егорова (Мэҥэ Хаҥалас) ыллылар. Эр дьоҥҥо Мэҥэ Хаҥаластан Гаврил Сидоров кыайыыны ситистэ. Афанасий Егоров (Дьокуускай) иккис, Михаил Аржаков (Чурапчы) үһүс миэстэ буоллулар.
