Алтынньы 17-18 күннэригэр Мэҥэ Хаҥалас улууһун Төхтүр сэлиэнньэтигэр Александр Валерьевич Сергучев аатынан бильярд кулуубугар Дьаҥхаады нэһилиэгин олохтооҕо, бильярд успуорун сүгүрүйээччитэ Николай Семенович Оконешников 60 сааһын туолбут үөрүүлээх күнүгэр аналлаах улуустааҕы бильярд күрэһэ ыытылынна.
Бу күн сарсыарда 9 чааска Дьаҥхаады туонатыгар улуус 9 нэһилиэгиттэн уонна ыаллыы Хаҥалас улууһун 2-с Дьөппөн нэһилиэгиттэн уопсайа 23 күөн көрсөөччү спортсменнар муһуннулар. Күрэс балаһыанньатын быһыытынан спортсменнар бары 40-тан үөһээ саастаах мин диэбит уоланнар.
Сэрэбиэй кэннэ күрэхтэһээччилэр 3 сиринэн: А.В.Сергучев аатынан бильярд кулуубугар, Төхтүргэ Степан Егорович Кычкин тус заалыгар уонна ыаллыы Томторго Михаил Семенович Оконешников тус заалыгар күрэс сүрүн судьуйата Владислав Власьевич Старостин быһаарыытынан күрэхтэһэ тарҕастылар.
Күрэс 24-4 диэн сетканан, 2 хотторууга дылы диэн быраабыланан ыытылынна.
Эбиэт омурҕаныгар күнүс 14 чааска А.В.Сергучев аатынан бильярд кулуубугар күрэс үөрүүлээх арыллыыта ыытылынна. Онно юбиляры эҕэрдэлээн туран бэйэлэрин үтүө тылларын, сэмэй бэлэхтэрин, Бочуотунай грамота, эҕэрдэ сурук туттардылар: А.М.Новиков аатынан Төхтүрдээҕи култуура киинин салайааччытын эбээһинэһин толорооччу Аян Васильевич Стручков, ыаллыы Чурапчы улууһун «Алаҕар нэһилиэгэ» ТСТ баһылыга Иван Иванович Оконешников, улуус бильярд федерациятын бэтэрээннэрин салайааччыта, ИДьУо, үлэ бэтэрээнэ Семен Антонович Егоров, Дьаҥхаады нэһилиэгин бильярд успуордун сүгүрүйээччилэрин аатыттан Василий Николаевич Стручков.
Юбиляр олоҕун аргыһа, тапталлаах кэргэнэ Надежда Константиновна Оконешникова спортсменнарга, ыалдьыттарга анаан эҕэрдэ ырыатын ыллаата, итиэннэ эмиэ кини салалтатынан бэрт элбэх минньигэс, араас эгэлгэ бүлүүдэлэрдээх сандалы остуола хото тардылынна.
Тыҥааһыннаах, эгил-тэгил киирсиилэр түмүктэринэн бириистээх миэстэлэргэ таҕыстылар:
- Михаил Оконешников (Томтор).
- Иван Васильев (Төхтүр).
- Гаврил Аргунов (Төхтүр).
- Степан Кычкин (Төхтүр).
5-6. Григорий Свинобоев (Тиэлиги, Мэлдьэхси).
5-6. Егор Торговкин (Төхтүр).
7-8. Василий Стручков (Төхтүр).
7-8. Егор Шарин (Мэлдьэхси).
А.М.Новиков аатынан Төхтүрдээҕи култуура киинэ, Бөкөттөн урбаанньыт Николай Николаевич Скрябин, юбиляр Николай Семенович Оконешников дьиэ кэргэнэ күрэскэ успуонсардаатылар.
Мантан салгыы 2026 сылга улуус спортсменнарын ахсынньы 12-13 күннэригэр Александр Валерьевич Сергучев кэриэһигэр ыытыллар улуус эр дьоҥҥо уонна 55-тэн үөһээ саастаах бэтэрээннэрин чөмпүйэнээттэрэ күүтэллэр.
Владислав Старостин,
улуус бильярд успуордун федерациятын сэкирэтээрэ, күрэс сүрүн судьуйата, СӨ муниципальнай сулууспатын туйгуна.
