Константин Родионов,
Бүтэйдээх кыраайы үөрэтэр түмэлин салайааччыта, Арассыыйа Суруналыыстарын сойууһун чилиэнэ, кыраайы үөрэтээччи:
— Бүгүн, ыам ыйын 7 күнүгэр, Владимир Путин РФ Бэрэсидьиэнин үрдүкү солотугар киирэр үөрүүлээх тэрээһинин тэлэбиидэнньэнэн анаан-минээн көрдүм-иһиттим. Владимир Владимирович киэҥ ыырдаах, дириҥ толкуйдаах, улахан уопуттаах салайааччы.
Мин, дойдубут үгүс олохтоохторун курдук, быыбарга киниэхэ куоласпын биэрбит буоламмын, устуоруйаҕа хаалар тэрээһини интэриэһиргээн көрдүм. Урукку өртүгэр ыытыллыбыт инаугурациялары үчүгэйдик толору көрбөтөх буоламмын, быйыл ордук болҕомтобун уурдум. Устуоруйаҕа дьоһун суолталаах Кириэмил Улахан дыбарыаһын Андреевскай саалатын дьиэтэ-уота мааныта, тэрээһин регламена чуолкайа, ыҥырыылаах ыалдьыта элбэҕэ сөхтөрдө уонна, биллэн турар, Бэрэсидьиэммит тыла-өһө ылыннарыылааҕа, бэйэтэ эрчимнээҕэ, эрэллээҕэ астыннарда. Саалаҕа мустубут элбэх киһиттэн Саха сириттэн сылдьар Госдуума дьокутаатын Сардаана Авксентьевнаны таба көрдүм.
Бэрэсидьиэн андаҕар тылын кэнниттэн Собуор болуоссатыгар Арассыыйа Үрдүкү Главнокомандующайа солотугар киирбитинэн Бэрэсидьиэн полкатын параада, Москва уонна Бүтүн Арассыыйа Патриарха Кирилл Благовещенскай собуорга сулууспата үөрүүлээх тэрээһин сиэрин-туомун өссө ситэрэн-хоторон биэрдилэр.
Бэрэсидьиэн андаҕарыгар эппит тылларыгар туран, барыта этэҥҥэ буоларыгар, дойдубут салгыы сайдарыгар баҕарабыт уонна онуоха эрэнэбит. Билиҥҥи кэмҥэ дойдубутун баай уопуттаах, киэҥ билиилээх киһи салайара ордук тоҕоостоох дии саныыбын.