Олунньу 23 күнүгэр, Аҕа дойдуну көмүскээччилэр күннэригэр, Р.Г.Васильев аатынан улуустааҕы кыраайы үөрэтэр түмэлгэ «Биир санаа, биир сорук» диэн анал байыаннай дьайыыга анаммыт, онно биир дойдулаахтарбыт кыттыыларын туһунан кэпсиир быыстапка арылынна.
Быыстапка түмэлгэ 2 нэдиэлэ устата туруоҕа. Манна дьон-сэргэ кэлэн дойдубут көмүскэлигэр сылдьар хорсун байыастар, эйэлээх хааллан туһугар сырдык тыыннарын толук уурбут буойуннарбыт туһунан кэпсиир экспонаттары, кинилэр тус малларын көрүөхтэрин сөп. Маны тэҥэ уолаттар тустарыгар улууска күннэтэ үлэлиир түмсүүлэр үтүө санааларын, илиилэрин сылааһын иҥэрэн оҥоро сылдьар харысхал сиэккэлэрэ, камуфляж арааһа, чүмэчи, о.д.а. тэриллэр көрдөрүүгэ турдулар. Хаһыс да төгүлүн гуманитарнай көмөнү тиксэрэр дэлэгээссийэ үлэтин көрдөрөр анал истиэндэ турда уонна киинэ (видеоролик) көстөр.
Бэлиэ тэрээһиҥҥэ кэлбит дьоҥҥо, буойуннар дьиэ кэргэннэригэр, аймахтарыгар, Майатааҕы «Түмэн» уопсастыбаннай түмсүүгэ күүс-көмө буолар В.П.Ларионов аатынан 8 «б» кылааһын юнармеецтарын «Сулус» этэрээтигэр улуус баһылыга Дмитрий Тихонов, Майа сэлиэнньэтин баһылыгын бастакы солбуйааччы Дмитрий Игнатьев, байыаннай комиссар Леонид Кириллин, «Доблесть» улуустааҕы бойобуой дьайыыылар бэтэрээннэрин уопсастыбатын бэрэссэдээтэлэ Афанасий Сергеев истиҥ тылларын эттилэр.
Биир дойдуулаах буойуннарбыт сырдык ааттарын үйэтитэр сыаллаах быыстапканы түмэл сүрүннүүр исписэлииһэ Александр Эверстов, «Түмэн» уопсастыбаннай түмсүү чилиэнэ Антонина Петрова сырдаттылар. В.П.Ларионов аатынан Майа орто оскуолатын 8 «в» кылааһын уолаттара (сал. Фекла Шарина) Иннокентий Артамонов «Тапталлаах Сахабыт дойдута» хоһоонуттан быһа тардыыны толордулар.
Биһиги хорсун-хоодуот быһыыларынан Ийэ дойдуга бэриниилээх буолуу үтүө холобурун көрдөрбүт дьоммутугар дириҥ ытыктабылбытын биллэрэбит. Киэн туттабыт, сүгүрэйэбит төрөөбүт дойдуларын туһугар, көҥүл олоҕу турууласпыт, туруулаһар дьоруойдарбытынан.
Иван Лукин.
