Хотун Төҥүлүттэн силистээх-мутуктаах, дуобакка Арассыыйа уонна IDF дуобат аан дойдутааҕы ассоциациятын маастара, 64 уонна 100 харахтаах дуобаттарга уолаттарга РФ, Европа, Аан дойду чөмпүйүөнэ, 2025 с. Турция Аланья куоратыгар 100 харахтаах дуобакка Аан дойду первенствотын ыччаттарга чөмпүйүөнэ, билигин ХИФУ физкултуураҕа салаатын 1-кы кууруһун устудьуона Прокопий Прокопьевич Говоров дуобат успуордун үрдүк чыпчаалларын дабайарыгар СӨ үтүөлээх, Мэлдьэхси нэһилиэгин дуобакка тириэньэрэ Василий Васильевич Куприянов көмө-тирэх буолар.
Прокопий туһунан кылгастык билиһиннэрдэххэ, бииргэ төрөөбүт төрдүөлэр. Мария Дмитриевна, Прокопий Прокопьевич Говоровтар дьиэ кэргэҥҥэ кыра уоллара Проня 2007 с. төрөөбүтэ. Кини оскуолаҕа киириэҕиттэн бүтэриэр диэри Намҥа баар өрөспүүбүлүкэтээҕи дуобат оскуолатын Мэлдьэхситээҕи салаатыгар тириэньэр Василий Куприяновка эрчиллибитэ. Ааспыт сыл алтынньы ыйга Мэлдьэхсигэ икки этээстээх, 8 кыбартыыралаах толору хааччыллыылаах таас дьиэ үлэҕэ киирбитэ. Мантан икки хостоох кыбартыыраны нэһилиэк баһылыга Валерий Никифоров Проняҕа аан дойду чөмпүйүөнэ буолбутунан анаабыт. Ыал улахан оҕото Герасим Дмитриевич Куприянов урбаанньыт буолан икки шиномонтаж үлэлэтэ уонна Өлүөнэ муостатын тутуутугар үлэлэһэ сылдьыбыт. Проня ийэтэ Мария Дмитриевна: “Тириэньэр Василий Куприянов Проням оскуолаҕа киирэр сылыгар Мэлдьэхсигэ үлэлии кэлбитэ. Үлэһит киһини тута бэлиэтии көрөммүн, оҕобун киниэхэ туттарбытым биһиги дьолбут буолла. Убайа Герасим “Тугу да быраҕан туран Проняны ханнык да күрэхтэһиилэри көтүппэккэ ыыта туруохха наада” диэн харчынан күүскэ өйөөн, оҕом Арассыыйа, аан дойду куораттарынан күрэхтэһэн элбэҕи биллэ-көрдө”, – диэн кэпсээтэ. Герасим Куприянов анал байыаннай дьайыы кыттыылааҕа, хорсун быһыытын иһин дойду Бэрэсидьиэнэ Владимир Путинтан Суворов мэтээлинэн наҕараадаламмыт. Дойду көмүскэлигэр ытык иэһин төлүү сылдьан олохтон туораабытын соторутааҕыта ийэ буорун булларбыттар.
Василий Куприянов көҕүлээһининэн, Төҥүлү бөһүөлэгин олохтоох дьаһалтатын өйөбүлүнэн, “Эйгэ” култуура киинигэр муус устар 15 күнүгэр дуобатчыт Прокопий Говоров 2026 с. муус устар 20-29 күннэригэр Турция Аланья куоратыгар ыытыллар дуобакка ыччаттар Европатааҕы күрэхтэһиилэригэр кытта барарынан, аахсыйа-сеанс ыытылынна. Дуобатчыт күрэхтэһиигэ гроссмейстер үрдүк аатын ылар иһин киирсиэхтээх.
Аахсыйаҕа улууспут нэһилиэктэриттэн бастыҥ дуобатчыттар кытыннылар, көрөөччүлэр, ыалдьааччылар кэлбиттэр. Прокопий Говоров 48 оонньооччуга, ол иһигэр, дуобат куруһуогар сылдьар оскуола оҕолоругар сеанс биэрдэ. Түмүккэ 5 оонньооччу тэҥнэһэн, 43 оонньооччу хотторон, очукуо ахсаана 45,5 : 2,5 сеансер туһатыгар буолла.
Дуобат успуордун энтузиаһа, Дьабыыл нэһилиэгин дуобакка тириэньэрэ, үлэ уонна успуорт бэтэрээнэ Анатолий Прокопьевич Стручков көҕүлээһининэн, 2022 с. Прокопий Говоров аан дойдутааҕы дуобат күрэхтэһиитигэр кытта барарыгар аахсыйа тэриллэн, аан дойду чөмпүйүөнэ үрдүк ааты сүкпүтэ.
Хотун Төҥүлүтээҕи аахсыйаҕа Прокопий абаҕата, СӨ норуотун маастара Леонид Говоров салайааччылаах тимир уустара Устин Борисов, Елисей Баишев, Трофим Попов, Василий Макаров бэйэлэрэ таптайан оҥорбут быһахтарын бэлэх уунан кыттыстылар. Маастардар бу бэлэхтэрин Леонид Прокопьевич тэрээһиҥҥэ үлэлэспит баһылык Петр Эверстовка, тириэньэр Василий Куприяновка, 2021 сылтан аахсыйа-сеансы тэрийсэр, Төҥүлү нэһилиэгин дуобатчыттарын түмсүүтүн салайар Дмитрий Харитоновка, култуура киинин исписэлииһигэр Афанасий Борисовка уонна сиэн быраатыгар Прокопий Говоровка сеанс тэрийэн дьонун-сэргэтин сэргэхсиппитигэр махтанан туттарда. Сеанска ситиһиилээхтик кыттыбыттар анал бириистэринэн бэлиэтэннилэр.
Биир дойдулаахтара тэрийбит аахсыйаларыгар уопсайа 170500 солкуобай көмө харчы киирдэ.
Дуобат успуордун үрдүк чыпчаалларын дабайарыгар күүс-көмө буола сылдьар биир дойдулаахтарыгар уонна дуобакка успуорт маастарыгар хандьыдаат, майалары босхо илдьэн-аҕалан аахсыйаҕа кылаатын киллэрсибит Гаврил Поповка Говоровтар аймах, Прокопий уонна кини эдьиийдэрэ Кристина, Карина, ийэтэ Мария Дмитриевна махталлара муҥура суох.
Өйү, толкуйу эрэйэр остуол оонньуутун үрдүк чыпчаалларын дабайар ыччаппытыгар ыра санаата туоларыгар баҕарабыт.
Марелла Баишева.
