Бүгүн ‒ кулун тутар 26 күнүгэр Моорук нэһилиэгэр сааскылыы ылааҥы ыраас чаҕылхай күн бэлиэ тэрээҺин буолла.
Мооруктар биллэр, айар талааннаах биир дойдулаахпыт Николай Афанасьевич Апросимов төрөөбүтэ 110 сылын бэлиэтээн үтүө өйдөбүнньүк, үйэтитии үөрүүлээх түгэнэ бэлиэтэннэ.
Олорон ааспыт дьиэтигэр мемориальнай дуоска арылынна. Николай Афанасьевич 1934-1938 сс. «Калинин» холкуоска комсомольскай тэрилтэ сэкирэтээринэн талыллан үлэтин саҕалаабыта. Сэбиэскэй-партийнай, хаһаайыстыбаннай үтүө суобастаах, олус сэмэй үлэһит. Кини ордук суруйааччы, ааптар, фольклорист быһыытынан биллэр. «Хотуттан кэпсээннэр», «Колхозтаах коммунистар», «Сүрүн үөскэ», «Үөлээннээҕим таптала» кинигэлэри суруйан бэйэтин кэмигэр чөкөтөн, кэлин дьоммор-сэргэбэр хаалыаҕа диэн бэчээттэппитэ. Кэлин айымньылара туспа кинигэнэн тахсыбыта. «Сүрүн үөскэ» сэһэнин: «Кэргэммэр, маҥнайгы ааҕааччыбар уонна сыанаһыппар аныыбын» диэн олус истиҥник ахтан, ийэбит үтүөтүн үрдүктүк сыаналаабыта диэн оҕолоро ахта-саныы сылдьаллар. Л.Н.Турнин диэн хомусчуттан элбэх норуот ырыаларын истэн, суруйан хаалларбыта. Бу үлэ «Саха нороднай ырыалара» хомуурунньук тахсарыгар матырыйаал буолбуттар. Кэлин ити үлэтин Моорук нэһилиэгиттэн төрүттээх, биир дойдулаахпыт, биллэр-көстөр, сүрүннээн оҕолорго анаммыт элбэх айымньылардаах суруйааччы Константин Сосин дипломнай үлэтигэр олук оҥостон туһаммыта ахтыллар. Николай Афанасьевич ааптар быһыытынан элбэх айымньылара «Хотугу сулус» 1947 с., «Чолбон» 1996 с. сурунаалларга бэчээттэммиттэрэ.
Оҕолоро Федор, Гаврил, Иван уонна кыыстара Мария, сиэннэрэ күн күбэй ийэлэрин, эйэҕэс эбэлэрин Дарья Гаврильевна Игнатьева аатын истиҥник санаан-ахтан, төрөппүттэригэр махталларын бэлиэтин аҕаларын кытары тэҥҥэ үйэтиттилэр. Бэлиэ тэрээһиҥҥэ Моорук нэһилиэгин олохтоох дьаһалтатыттан баһылыгы солбуйааччы Георгий Лобанов, нэһилиэк бибилэтиэкэтин үлэһитэ Александр Иванов, үлэ бэтэрээнэ, өр кэмҥэ үтүө суобастаахтык бибилэтиэкэрдээбит, ааспыт кэмнэргэ бу Николай Афанасьевичка анаан араас тэрээһиннэри ыыппыт, СӨ култууратын туйгуна Тамара Егорова, нэһилиэк литературнай мусуойун төрүттээччи, кыраайы үөрэтээччи, Учууталлар учууталлара, РФ норуотун үөрэҕириитин туйгуна, элбэх кинигэлэр ааптардара, Моорук нэһилиэгин Бочуоттаах олохтооҕо, 94 хаарыгар үктэммит Ытык кырдьаҕаспыт Аполлон Апросимов бииргэ төрөөбүт эдьиийинээн Тамара Михайловналыын, нэһилиэк К.К.Байкалов аатынан устуоруйа түмэлэ, олохтоохтор, аймахтар кыттыыны ыллылар.
Александра Уваровская, Моорук
