“Бочуот знага” уордьан кавалера, СӨ култууратын үтүөлээх үлэһитэ, ССРС култууратын туйгуна, СӨ култууратын уонна ускуустубатын Бочуоттаах үлэһитэ Дмитрий Дмитриевич Тихонов ахсынньы 4 күнүгэр Тааттанан, Чурапчынан биир күннээх кэнсиэрэ буолла.
Улуу Ойуунускайга уонна кини кыыһа филолог Сардаана Ойунская төрөөбүтэ 90 сылыгар аналлаах икки чаастаах кэнсиэр буолла. Бастакы чааһыгар Былатыан Ойуунускай хоһооннорунан композитор Аркадий Самойлов 8 бастыҥ чулуу хоһооннорун-айымньыларын талан ырыа-кантата диэн музыка айан “Мин аатым ааттаныа” вокальнай поэма-кантата толорулунна: “Син биир буолбаат”, “Ыһыах үҥкүүтэ”, “Оһуохай”, “Көтүү оһуохай”, “Чохчоохой”, “Ийэм Дьэбдьэкиэй уҥуоҕар”, “Бу уоттаах бакаалы”, “Мин аатым ааттаныа”. Ити кантата сүрүннээн П.А.Ойуунускай революционнай олоҕун, сэбиэскэй былаас, норуот былааһын иһин охсуһар кэмин сырдатар.
Иккис чааһыгар Улуу Ойуунускай уонна кыыһа Сардаана Ойунская “Таптал тойуга” диэн ааттаан аҕалаах кыыс оҕо ситимнэрин көрдөрөр.
Кэнсиэр “Таптал тойуга” чааһыгар “Ойуунускай туһунан ырыа”, Степан Дадаскинов тыл, Гаврил Слепцов-Дьиэрэҥкэй мел. ‒ “Ойуунускай алааһа”, П.Ойуунускай тыл, Дмитрий Михайлов мел. ‒ “Доҕорбор Сүөкүччэҕэ”, П.Ойуунускай тыл., Аркадий Самойлов муз. ‒ “Ийэм Дьэбдьэкиэй уҥуоҕар”, “Бу уоттаах бакаалы”, П.Ойуунускай тыл., олохтоох ааптар Таатта Ытык Күөлүн мелодиһа Карл Христофоров мел. ‒ “Куоттарбыт кутурҕана”, Сардаана Ойунская тыл., Афанасий Новгородов мел. ‒ “Дьол диэн тугуй?” хоһоон-ырыалар бэрт сэргэхтик, киһини долгутар гына толорулуннулар, Дмитрий Дмитриевич доллоһута ыллаата.
Улуу суруйааччы П.А.Ойуунускай төрөөбүт-үөскээбит сириттэн Чөркөөхтөн, Ытык Күөлтэн, үһүс кэргэнин Өкүүчэ – Акулина Николаевна Борисова-Ойунская дойдутуттан Чурапчы Болтоҥотуттан биир дойдулаахтара, аймахтара, кэнчээри ыччаттара бэрт сэргэхтик кэнсиэри иһиттилэр, дьиҥнээх чахчылары, историяны биллилэр-көрдүлэр. Кэнсиэр бастакы чааһын концертмейстер, СӨ култууратын үтүөлээх үлэһитэ, Майатааҕы М.К.Попова аатынан оҕо искусствотын оскуолатын фортепианнай салаатын салайааччыта, уһуйааччы Светлана Маркова, иккис чааһын М.К.Попова аатынан оҕо ускуустубатын оскуолатын байаан кылааһын уһуйааччыта, аккомпаниатор Даниил Алексеев доҕуһуоллаатылар. Итиэннэ кэнсиэри иилээн-саҕалаан, хоһоон-ырыалар тустарынан сырдатан Д.Ф.Ходулов аатынан норуот айымньытын дьиэтин маассабай тэрээһиннэрин режиссера, СӨ култууратын туйгуна Галина Эверстова ыытта.
“Үс саха төрүөҕэр
Үөрүүлээх күнүгэр
Мин аатым ааттаныа
Мин ырыам ылланыа” тылларынан кэнсиэр түмүктэннэ.
