Көмүс күһүн күлэн-үөрэн тиийэн кэллэ. Иван Гаврильевич Тимофеев аатынан Майатааҕы лиссиэй аанын 265 үөрэнээччигэ тэлэччи арыйда: оҕолор сайын улаатан, күүс-уох мунньунан үөрэхтэрин саҕалаатылар. Лиссэйиистэр сыллата баччаларга, үгэс быһыытынан, үөрэҕи кытта үлэни, амарах санааны холбуу тутан бэтэрээннэрбитин кытта алтыһаллара, көмөлөһөллөрө хайҕаллаах . Быйыл тимуровскай көмөнү 11 -1, 11-2 кылаас уолаттара саҕалаатылар. Өр сылларга Майа гимназиятыгар үлэлээбит, билигин бочуоттаах сынньалаҥҥа олорор бэтэрээннэрбитигэр Марфа Петровна Заровняеваҕа, Надежда Иннокентьевна Куприяноваҕа дьиэ тас үлэтигэр, оҕуруоту хомуйууга көмөлөстүлэр. Кураатардар Попова Анжелика Ивановна, Жирков Федор Федорович, Харитонова Мария Иннокентьевна, Варламова Лилия Данидовна. Дьону үөрдэн уолаттар сүргэлэрэ көтөҕүллүбүтэ саарбахтаммат. Аныгыскы нэдиэлэҕэ 10 кылаас үөрэнээччилэрэ тимуровскай үлэҕэ барарга бэлэмнэнэллэр. Үтүөнү оҥорбутуҥ үс бүк бэйэҕэр эргиллэр диэн мээнэҕэ эппэттэр.
Петрова Мидена, Майатааҕы лиссиэй боропсойууһун бэрэссэдээтэлэ
