Арассыыйаҕа Дьиэ кэргэн, өрөспүүбүлүкэҕэ Оҕо саас, улууска Тыа хаһаайыстыбатын сылларыгар анаммыт «Оҕо саас, дьиэ кэргэн уйгулаах олоҕун уруйдаан туойабыт!»диэн девистээх улуустааҕы аҕам саастаах дьон бэстибээллэрэ быйыл 11-с сылын ыытыллар.
Ыллыыр-туойар Тараҕай сиригэр сэтинньи 14 күнүгэр 4 нэһилиэк бэтэрээннэрэ үөрэ-көтө бэрт көхтөөхтүк түмүстүлэр. Сэрэбиэй тарданнар олохтоохтор бастакынан быыһы арыйдылар.
«Алгыс» дьахталлар вокальнай ансаамбылларын «Далбар хотун», эр дьон квинтетин «Аллаах ат» ырыалара лауреат, Иван Чыычаахап «Эн ийэҥ майгыта, эн аҕаҥ хараҕа» иэйиилээх солота, «Дэйбиирдээх үҥкүү» дипломант буоллулар.
Табаҕалар кэннилэриттэн Бүтэйдээхтэр «Айылгы» фольклорнай бөлөхтөрө норуот ырыатынан кэнсиэрдэрин саҕалаан грамотанан биһирэннэ. «Аан дойду ыччатын сүрэҕэ» эр дьон бөлөҕүн толоруутугар, «Сиэдэрэй» бөлөх «Олбохтоох үҥкүүтэ», Анна Филиппова Степан Тимофеев «Суолаҕа» хоһоонун уус-уран ааҕыыта ытыс тыаһынан доҕуһуолланан дипломант буоллулар.
Иннокентий Чямпин Аркадий Алексеев «Доҕоруом, дабай күөх сыырдаргын» ырыатынан лауреат буолан дьону үөртэ.
Моорук Суолатын бэтэрээннэрин фольклорнай бөлөҕө норуот ырыаларынан попуррита, дьахталлар вокалга бөлөхтөрүн «Ферма кыргыттара» ырыата дипломант буоллулар. Бөлөҕүнэн уус-уран ааҕыы, биир дойдулаахтарын Валентин Макаров «Эдьиийбэр Таанньаҕа» ырыатыгар туруоруллубут «Суолаҕа» үҥкүү грамотанан бэлиэтэннилэр.
Бэстибээл бастакы күнүн Алтан нэһилиэгин уус-уран кэнсиэрэ түмүктээтэ. «Алгыстаах оһуор-ойуу» арчы үҥкүүтэ, эр дьон толоруутугар Иннокентий Сосин тылларыгар «Саха ыала» ырыа лауреат буоллулар. Бальнай үҥкүү бөлөҕө уонна «Сахам сирэ» ырыаны иэйиилээхтик толорон Валентина Петрова дипломант аатын сүктүлэр.
Бу күн олохтоохтор уонна Моорук айар дьарыктаахтара дьон көрүүтүгэр быыстапка туруордулар.
Табаҕаҕа Евгения Тарасовна Егорова, Марианна Викторовна Маркова үөрэтээччилээх Үһүс көлүөнэ куруһуогун үөрэнээччилэрин оҥоһуктарын көрбүт барыта сэргээтэ.
91 саастаах тыыл бэтэрээнэ, ытыктанар далбар хотун, элбэх оҕо эбээтэ, хос эбээтэ Мария Михайловна Сосина саахыматтыы тигиллибит көбүөрэ хараҕы сымнатар дьэрэкээн көстүүлээх.
Түмүккэ бэстибээли салгыы сайыннарыыга санаа атастаһыыта буолла.
Аҕам саастаах дьон олоххо тардыһыытын күүһүрдэр,үйэтин уһатар, талаанын киэҥ эйгэҕэ көрдөрөр соруктаах бэстибээл салгыы айанныыр.
Евдокия Решетникова,
улуус бэтэрээннэрин сүбэтин салайааччы.
