1-кы Баатара нэһилиэгэр баһылык отчуота күн иккис аҥаарыгар буолла.
Бэдьимэ олохтоохторо улуус баһылыга Дмитрий Тихонов көрдөрөр сириэстибэни туһанан иһитиннэрбит 2024 сыллааҕы үлэ отчуотун истэн баран ыйытыыларын биэрэн, отчуоттуур бөлөх кыттыылаахтарын толору хоруйдарын иһиттилэр. Мунньаҕы нэһилиэк баһылыга Петр Андросов салайан ыытта.
Кинилэр сүрүннээн тыа хаһаайыстыбатын боломуочуйатын улуус хайдах быһаарар толкуйдааҕын, үүт харчыта хаһан кэлэрин, суол оҥоһуллуутун, саҥа кэлэр учууталларга анаан уопсай дьиэ тутуутун, оптуобус сырыытын, олохтоох таксилар сыаналарын бэрээдэктээһини, почта сырыытын тупсарыыны сурастылар.
Тыа хаһаайыстыбатынан дьарыктанааччыларга үбүлээһин сүөһү төбөтүнэн тыырыллара ордук диэн Иван Аргунов эттэ. Үүт харчытыгар кэпэрэтииптэр, тэрээһиннээх хаһаайыстыбалар тарыыптара үрдүк буолара наада, кэтэх хаһаайыстыбаларга эмиэ үүккэ харчы көрүөххэ диэн санаатын эттэ. Олохтоох бэйэни салайыныы саҥа сокуона – биир таһымнаах ситимҥэ көһүү – олоххо киирэрэ сөп, онуоха олус утарыласпакка биир санаанан киирэрбит олох ирдэбилэ диэтэ Иван Дмитриевич.
Бэдьимэлэр уонтан тахса сыллаах туруорсуулара – оскуола тутуута дьэ быһаарыллар суолга киирбититтэн астыналларын, махтаналларын туһунан Михаил Попов эттэ. Кини бөһүөлэккэ баар электроуот трансформаторын Тыа хаһаайыстыбатын министиэристибэтин көрүүтүттэн уот ситимин көрүүтүгэр көһөрүүнү улуус хонтуруоллууругар көрдөстө. «Улууска Тыа хаһаайыстыбатын иккис сыла түмүктэнэн эрэр, ол эрээри көрдөрүү сэмэй буолара өйдөнөр, түмүк кэнники көстүө. Сүрүн болҕомто, үбү көрүү үүккэ буолара ордук. Эһиилги, 3-с сылга, дьон өйүгэр-санаатыгар хаалар курдук, туох эмэ күүстээх, түмүктээх буолар хамсаныыны оҥоруохха диэн санаатын эттэ. Онуоха ынах боруодатын тупсарыыга, сиэмэлээһиҥҥэ, бородууксуйаны соҕотуопкалааһыҥҥа, о.д.а. биир кэлим былааннаах тэрээһин, сэниэлээх, күүстээх үлэ ыытылларыгар баҕарабын», — диэтэ Михаил Константинович. Нэһилиэктэргэ эдэр исписэлиистэргэ аналлаах 8-12 кыбартыыралаах дьиэлэри тутары былааҥҥа ылыныахха диэтэ. Уу боппуруоһа сытыытык турар, онон Оһоҕостооххо аһыллар-сабыллар быһыт тутуллара наадатын эттэ. Бэдьимэ олохтоохторо үксүн Төхтүрүнэн быһа суолунан сылдьар буоланнар, инникитин бу суолу оҥорууну болҕомтоҕо ылалларыгар туруорсалларын бэлиэтээтэ.
Олохтоохтор бары оскуола тутуллар буолбутуттан сүргэлэрэ көтөҕүллүбүтүн, аны онуоха үлэлии кэлэр учууталларга толору хааччыллыылаах уопсай дьиэ баар буолуон, үтүө дьыала хамсааһын иитинэн тутуллубут балаҕан-түмэл киинтэн ититиигэ холбонуон, билигин оскуолаҕа дириэктэр ананан үлэлиирэ наадатын дириэктэри иитэр үлэҕэ солбуйааччы Екатерина Попова эттэ. Екатерина Николаевна кэнники сылларга өрөспүүбүлүкэҕэ бастыҥ көрдөрүүлээх улуустааҕы хабылык, хаамыска федерациятыгар салайааччы аныылларыгар көрдөстө.
Бэдьимэҕэ улуус баһылыгын отчуотугар 54 киһи сырытта.
Февронья ОХЛОПКОВА.
