Саха Өрөспүүбүлүкэтин экономикаҕа миниистирэ, улуус кураатара Петр Попов салайааччылаах бөлөх күн иккис аҥаарыгар Бырабыыталыстыба отчуотун 1-кы Баатара нэһилиэгин олохтоохторун иннигэр туруорда. Мунньаҕы нэһилиэк баһылыга Петр Андросов киирии тылынан арыйда.
Бэдьимэлэр отчуоттуур дакылааты истэн баран ыйытыыларын биэрэн, этинэн олохтоохтору бу күҥҥэ туох боппуруос долгутарын иһитиннэрдилэр. Өрөспүүбүлүкэ суолталаах суолу оҥоруу, олохтоох бэйэни салайыныы боломуочуйатын кэҥэтии, бэтэринээрдэр оҥорор өҥөлөрүн төлөбүрэ, хаайтарыы кэмигэр салгын олбохтоох уу аалларын сыаналарын бэрээдэктээһин, о.д.а. туһунан чопчуластылар.
Өр сыллаах туруорсуулара – оскуола тутуута саҕаланан, быһаарыллар суолга киирбититтэн Бэдьимэ олохтоохторо олус астыналларын, өрөспүүбүлүкэ салалтатыгар, бырабыыталыстыбаҕа махтаналларын туһунан Екатерина Попова уонна бары тыл эппиттэр бэлиэтээтилэр.
Егор Захаров тыа сиригэр уматык сыанатыгар судаарыстыба өттүттэн чэпчэтиини көрүү, кэтэх хаһаайыстыба тутар дьон сааһыраннар, сүөһү ахсаана аҕыйыыр чинчилээх, онуоха ити боппуруостары быһаарыыга сүбэ-соргу наадатын эттэ. Манна бөлөх салайааччыта боломуочуйа улууска бэриллибитин, ааҕан-суоттаан, үөрэтэн көрөн баран улуус салалтата сөптөөх быһаарыы ылыммытын, инникитин үүттэн дохуоту ылар суоллары тобулуохха наада диэтэ. Сунтаар улууһугар баар “Сырдык аартык” диэн атын нэһилиэктэртэн эрэ буолбакка, атын улуустартан, бэл, Дьокуускай куорат олохтоохторуттан сүөһүлэрин ылан көрөн олорор хаһаайыстыба уопутун билсиэххитин сөп диэн сүбэлээтэ.
Василий Попов «Кыым» хаһыат нүөмэрэ бэчээттэммэтэҕин этэн туран, инникитин атын да хаһыаттары судаарыстыба өттүттэн өйөбүл хайдах буолуой диэн туоһуласпытыгар, чопчу бу хаһыакка өйөбүл баар, тахсыбыт түбэлтэ быстах уонна быһаарыллар боппуруос диэн хоруйу ылла.
Уматыкка көрүллэр өйөбүл ирдэбилин уларытары туруорсан Петр Захаров эттэ. Кини нэһилиэк сирэ кыараҕаһынан тэйиччи баран оттуулларын, ол отторун тиэйиигэ элбэх ороскуоту көрсөллөрүн итиэннэ оҥорон таһаарар бородууксуйаларын батарыыны ыарырҕаталларын бэлиэтээтэ. Онуоха Петр Иванович сүрүн сыалбыт-сорукпут – олохтоох бородууксуйаны элбэтии, онон соҕотуопкалааһыҥҥа, ас хаачыстыбатын тупсарыыга, бастыҥ аһы-үөлү бренд оҥорон таска таһаарыыга күүскэ үлэлиэхпитин наада диэн ыйда.
Ил Түмэн дьокутаата Захар Никитин Дьокуускай куоракка “Дойду ситимэ” түмсүү улуус сайдыытыгар үлэтин-хамнаһын билиһиннэрдэ, биир дойдулаахтарын этиилэрин, көрүүлэрин истэргэ бэлэмин туһунан эттэ.
Бэдьимэҕэ отчуоту 72 киһи кэлэн иһиттэ. Кинилэр бары ыйытыктарыгар, этиилэригэр бөлөх салайааччытын Петр Попов, министиэристибэлэр эппиэттээх үлэһиттэрин, улуус баһылыгын Дмитрий Тихонов сиһилии быһаарыыларын ылан, СӨ судаарыстыбаннай былааһын толорор уорганнарын отчуотуттан астыммыттарын биллэрдилэр.
Февронья ОХЛОПКОВА.
