Быйылгы 2024 сыл биһиги нэһилиэкпитигэр Аҕа сылынан биллэриллибитэ. Ол чэрчитинэн Аҕа дойдуну көмүскээччилэр күннэригэр анаан оскуолабытыгар «Мин аҕабынаан» күрэҕи төрөппүт сүбэтэ (бэрэссэдээтэл Андреева С.А., соцпедагог Мордискина Ф.В.) бэркэ тэрийэн ыытта.
Күрэх сыалынан буолла дьиэ кэргэҥҥэ аҕа оруолун үрдэтии, сахалыы төрүт оонньууларын билии, биир сомоҕо буолуу.
Поповтар Тимур аҕатынаан Гаврил Петровичтыын, Петровтар Валера эһэтэ Валерий Васильевичтыын, Чемезовтар Ганя, Юрий Петрович, Захаровтар Арчын, Пётр Петрович, Прокопьевтар Алёша, Дмитрий Гаврильевич көхтөөх кыттыыны ыллылар.
Дьиэ кэргэттэр сахалыы оонньууларга күрэхтэстилэр. Ол курдук мүһэ былдьаһыы, кириэс тэбии, сиэл мээчигинэн таба быраҕыы, салгын саатынан сыал ытыы, өс хоһооннорун ситэрдилэр уонна саҥа тарҕанан эрэр «СахаЭМБЛ» хомуур күрэҕэр холоннулар.
Бары эгил-тэгил түсүһэн кыайыылаахтар быһаарыллан грамотанан, дьаһалта туруорбут мэтээллэринэн наҕараадаланаллар. Киһи үөрэрэ диэн өссө маннык күрэх буолуо дуо, дьарыктаныахха наада эбит дэстилэр аҕалар.
Биһиги өбүгэлэрбит оонньуулара уол оҕону төгүрүччү сайыннараллар диэн салгыы атын оонньуулары киллэрэн иһиэххэ наада!
Екатерина Попова
