Ахсынньы 9 күнүгэр Аҕа дойду Дьоруойдарын күнүгэр Бэдьимэ оскуолатыгар дириҥ ис хоһоонноох «Дьоруойдар биһиги ортобутугар» дьоһуннаах кэпсэтии буолла.
Бу күн биһиги выпускникпыт, Бэдьимэ биир бастыҥ ыччата байыаннай дьайыыга олоҕун толук уурбут Пётр Петрович Баишев чугас дьоно кэлэн ыалдьыттаатылар, оскуолаҕа Пётр туһунан стендэни бэлэхтээтилэр.
Петя оскуолаҕа хайдах үөрэммитин, туох дьоҕурдааҕын, хайдах майгылааҕын, туох ситиһиилээҕин туһунан кылааһын салайааччыта Клавдия Кимовна Захарова презентация бэлэмнээн оҕолорго билиһиннэрдэ.
Эдьийэ Александра Пётр оҕо сааһын, элбэх доҕоттордооҕун, успуорка дьоҕурдааҕын, убайа Павел быраатын полицияҕа үлэтин-хамнаһын, аврмыйаҕа сулууспатын, байыннай дьайыыга хайдах сылдьыбытын туһунан кэпсээтилэр. Абаҕата Фёдор Константинович, саҥаһа Екатерина Прокопьевна оҕолорго дьиҥнээх патриот диэн хайдах киһини ааттыылларын өссө төгүл өйдөттүлэр, бырааттарынан киэн тутталларын эттилэр, кини аатын үйэтитиигэ былааннарын билиһиннэрдилэр.
Оҕолор Петя Арассыыйа туһугар хорсун сулууспатын иһин ылбыт «Эр санаа уордьанын» тутан-хабан, сыныйан көрөн астыннылар.
Өссө биир ыалдьыппытынан уоппускаҕа кэлбит биир дойдулаахпыт, выпускникпыт Гаврил Неустроев буолла. Кини Петя туһунан ахтыытыгар мэлдьи сибээскэ сылдьыбыттарын, онно балаһыанньа хайдаҕын кэпсээн барыбытын долгутта…
Ыалдьыттар оҕолор ыйытыыларыгар сиһилии эппиэттээтилэр, сэмэй бэлэх тутан соһуйа үөрдүлэр. Дьоруой ийэтигэр оҕолор биир дьааһык отон ыыттылар.
Кырдьык да кэпсэтии дьоһуннаах буолла, оҕолор патриотическай тыыҥҥа иитиллиилэрэ маннык кэпсэтиилэртэн, хорсун быһыы холобурдарыттан тахсар. Дьоруойдар ааттара умнуллубатын, кинилэр биһиги ортобутугар баалларыттан киэн туттабыт!!!
Екатерина Попова
