Ханна да буоларын курдук, биһиги бөһүөлэкпитигэр Бэдьимэҕэ араас түмсүүлэр үлэлииллэр.
Олортон биирдэстэрэ «Талба туосчуттар» түмсүү буолар. Салайааччы ‒ улуус норуотун маастара, «Дархан уус» бэлиэ хаһаайына Мария Сергучева. Аата да этэринии, түмсүүгэ аҕыйахтар эрээри туоһунан үлэлээбиттэрэ ыраатта. Сылын аайы култуура уонна успуорт эстэпиэтэтигэр ситиһиилээхтик кытталлар.
Быйыл сайын түмсэн, маастар кылааһы тэрийдилэр. Манна араас быыстапкалар, көрүүлэр кыттыылаахтара, бэйэбит кыыспыт Виктория Свинобоева ыалдьыттаата, маастар кылааһы ыытта. Виктория Ивановна кэлиҥҥи кэмҥэ туоһунан, сиэлинэн утумнаахтык дьарыктанан, элбэх ситиһиилэрдээх. Өрөспүүбүлүкэҕэ тууйаһы оҥорууга бастаабыта, быйыл алаадьы иһитин оҥорууга Туймаада ыһыаҕар иккис миэстэни ылары ситиспитэ. «Өрөспүүбүлүкэ уус-уран оҥоһуктарга маастара» буолбута. Үлэлэринэн норуоттар икки ардыларынааҕы быыстапкаҕа кыттаары бэлэмнэнэ сылдьар. Былырыын маннык быыстапкаҕа ыҥырыллан кыттыбыта, анал аатынан наҕараадаламмыта. Быйыл өрөспүүбүлүкэттэн икки эрэ киһи ыҥырыллыбыт эбит.
Бириэмэ аттарынан Виктория биһиэхэ кэлэн, туоһунан корзина оҥорорго үөрэттэ, сатабылын көрдөрдө. Олус сэмэй, илиитигэр талааннаах кыыспытыгар махтанабыт, салгыы өссө үрдүк ситиһиилэри баҕарабыт.
Марина Яковлева, Бэдьимэ.
