«Мэҥэ кэскилэ» улуустааҕы оҕо уопсастыбаннай түмсүүтэ 2022 сылтан саҕалаан үлэлиир. Ол түмсүүнү сайыннарар сыалтан улуус баһылыга Дмитрий Тихоновы кытта 21 киһи састааптаах сүрүннүүр сэбиэт мунньаҕа буолан ааста.
Баһылык Дмитрий Иванович ыҥырыытынан «Бастыҥнар хамсааһыннара» оҕо-ыччат Бүтүн Арассыыйатааҕы уопсастыбаннай-судаарыстыбаннай хамсааһынын эрэгийиэннээҕи салаатын бэрэссэдээтэлин солбуйааччы Александр Кузьмин кэлэн үлэ хайысхаларын, ханнык бырайыактар баалларын сырдатта. «Кэрэли» эбии үөрэхтээһин киинигэр, салайааччы Александра Охлопковаҕа «Юнармия дьиэтэ» диэн сибидиэтэлистибэни туттарда. Маннык ыстаатыһы өрөспүүбүлүкэҕэ икки улуус киинэ ылбыт (биир дьиэ Бүлүү улууһугар баар буолбут).
Саха сиринээҕи «Оҕо саас навигатордара» ресурснай киин салайааччыта Ньургуйаана Макарова: «Оҕону иитэр эйгэбит интэриэһинэй уонна киэҥ буолуохтаах», – диэн бэлиэтээтэ. Үөрэнээччи төрөөбүт дойдутунан киэн туттар буола улаатарыгар 8 национальнай бырааһынньык киирбит. Алын кылаастарга «Арассыыйа Өрүөлчээннэрэ», хас бэнидиэнньик ахсын бары оскуолаларга «Дьоһуннааҕы кэпсэтии» ыытыллаллар эбит. Мэҥэ Хаҥаласка баһылык грана баар. Бу тосхоллору туһанан оҕону гражданин уонна патриот гына иитэн таһаарыахтаахпыт диэтэ.
«Мэҥэ Кэскилэ» сүрүннүүр киин салайааччыта Марианна Монастырева «биһиги инники кэскилбит оҕолорбутуттан тутулуктаах» диэн этэн туран, хамсааһын хайысхаларын, марафон сорудахтарын көрдөрдө.
Бу маннык хамсааһыннар оҕолорбутун, эдэр ыччаппытын сөптөөх суолунан иитэрбитигэр туһуланаллар.
Елизавета НЕУСТРОЕВА.
