Кулун тутар 1 күнүгэр 1-кы Тыыллыма нэһилиэгин бастыҥнара Баатара нэһилиэгэр үтүө үгэс буолбут 69-с В.К.Степанов аатынан култуура уонна успуорт эстэпиэтэтин былааҕын күөрэччи тутан кэллилэр.
Успуорт сытыы, өрө күүрүүлээх киирсиилэригэр 20:15 ахсааҥҥа лоомтукалар кыайыы өрөгөйүн биллилэр.
Түөлбэ үйэлээх үгэһин утумнаан күн иккис аҥаарыгар Сыымах кылыһахтаах куоластаахтара, киэҥ түһүлгэлээхтэрэ, уран тыллаахтара оһуокай түһүлгэтин төрүттээтилэр. Оҕолорго Тускун Эверстов, Айыына Самсонова итиэннэ Саргылаана Варламова үҥкүү тылын таһаардылар. Оһуокайдьыттар устар ууну сомоҕолуур уран тылларын чочуйан, киэҥ түһүлгэни көҕүлүүр, баһылыыр эһиэкэй этээччилэрэ үүнүөх тустаахтарын бэлиэтээн, лауреат үрдүк аата Саргылана Варламоваҕа иҥэриллэн туран, Баатара оһуокайа 4,08 баалга сыаналанна.
Лоомтука сэлиэнньэтин уус-уран самодеятельноһын кэнсиэригэр бары ирдэнэр нүөмэрдэри чочуйан, сааһылаан бэлэмнээбиттэр. Бары көлүөнэ талааннаахтара айымньылаах аартыгы арыйан саҥа киирбит сүүрээннэри хото, умсугуйан туран кыттыыта көрөөччү болҕомтотун ылыан ылар.
1-кы Тыыллыма уус-уран самодеятельноһын кэнсиэрин көрүү түмүгүнэн Лоомтука хора (сал.Валентина Никифорова), «Тэтим» үҥкүү бөлөҕө (сал.Вероника Черкашина), фольклорнай коллаборация (сал.Виталий Никифоров), уус-уран ааҕыы бөлөҕө (сал.Елена Чичахова), Евдокия Ларионова, квартет (сал.Валентина Никифорова), Леонид Винокуров дипломант үрдүк аатын туоһутун туттулар.
Ону тэҥэ 1-кы Тыыллыма хора (сал.Валентина Никифорова, Виталий Никифоров), хомуска төрүт дорҕоону бэлэх ууммут Валентина Никифорова, «Көлүкэчээн» вокальнай ансаамбыл (сал.Валентина Никифорова), «Тамыл» эр дьон вокальнай ансаамбыла (сал.Леонид Винокуров), сценка «Култуура уонна успуорт эстэпиэтэтигэр кастинг» (сал. Виталий Никифоров), «Тэтим» үҥкүү бөлөҕө (сал.Вероника Черкашина) В.К.Степанов аатынан 69-с култуура уонна успуорт эстэпиэтэтин лауреатын үрдүк аатын ылары ситистилэр.
Түмүгэр 1-кы Тыыллыма уус-уран самодеятельноһын кэнсиэрэ 4,14 баалга тэҥнэстэ.
Станислав Иванов,
Мэҥэ Хаҥалас улууһун култуураҕа уонна духуобунай сайдыыга салалтатын иһитиннэрэр-мэтэдиичэскэй киинин мэтэдьииһэ, дьүүллүүр сүбэ чилиэнэ.
