Бүгүн, ахсынньы 20 күнүгэр, Аллараа Бэстээххэ олимпийскай чөмпүйүөн Тимир Пинегин аатынан «Парус» успуорт уораҕайыгар «Баскетбол 3х3» Мэҥэ Хаҥалас улууһун аһаҕас күрэхтэһиитэ буолла.
Күрэхтэһии чулуу спортсменнарын бэлиэтиир уонна чөл олоҕу пропагандалыыр сыаллаах соруктаах ыытылынна. Кылаабынай судьуйанан Саха Сирин элбэх төгүллээх чөмпүйүөнэ, анал үөрэхтээх, 3-с категориялаах судьуйа Аял Будищев үлэлээтэ.
Улууспут араас муннуктарыттан уонна Дьокуускайтан 8 хамаанда кэлэн икки бөлөххө хайдыһан күөн көрүстүлэр.
Түмүккэ 3-с миэстэ иһин киирсиигэ Дмитрий Брызгалов, Валентин Сидоров, Дьулустан Тарабукин састааптаах «ВДВ» хамаанда 1 очукуонан Юрий Филиппов, Дмитрий Деменков, Евгений Исаков, Дмитрий Игнатьев састааптаах «Чөл Майа» хамаанданы кыайан иннигэр түстэ.
Финалга лаппа баһыйа тутан Дьокуускайтан Алексей Неустроев, Сергей Данилов, Роман Пушкарев, Владимир Николаев кыттыылаах ХИФУ хамаандата Майаттан Арсен Охлопков, Роман Архипов, Сергей Архипов кыттыылаах «М2» хамаанданы кыайан чөмпүйүөн үрдүк аатын ылла. «Бастыҥ оонньооччу» анал ааттаах куубак хаһаайынынан ХИФУ оонньооччута Владимир Николаев буолла. Күрэхтэһии кыайыылаахтара мэтээлинэн уонна куубагынан наҕараадаланнылар. Күрэхтэһиини Филипп Лонгинов салайааччылаах Мэҥэ Хаҥалас баскетболга федерацията иилээн-саҕалаан ыытта.
Дмитрий Игнатьев, «Чөл Майа» хамаанда оонньооччута.
