Муус устар 10 күнүгэр Балыктаах эбэтигэр олимпийскай көрүҥҥэ киирсэр керлинг күрэҕэ биһиги нэһилиэкпитигэр бастакытын ыытылынна.
Керлинг күрэҕэ биир дойдулаахпыт Варвара Игоревна Березкина кэргэнинээн Кузьма Иннокентьевичтиин уонна олохтоох култуура дьиэтин көҕүлээһиннэринэн ыытылынна. Керлинг диэн мууска хамаанданан оонньуу. Турнир саҕаланыытыгар Петр Дохунаев аал уоту оттон сиэри-туому толордо. Ол кэннэ Варвара, Кузьма Березкиннар успуорт бу көрүҥүн туһунан, хайдах тэриллэн барарын, быраабылатын кытта билиһиннэрдилэр. Күрэххэ барыта иккилии киһилээх 8 хамаанда: Семен Ноговицын уонна Петр Дохунаев «Эрчим», Егор Афанасьев уонна Игорь Стручков «Оо!», Гаврил Дьяконов уонна Николай Цыпандин «Дьулуур», Илья Шишигин уонна Айаал Протодьяконов «Дьулурхан», Сергей Мохначевскай уонна Данил Иванов «Мохсоҕоллор», Татьяна Иванова уонна Лилия Долгунова «Эрэл», Елена Гоголева уонна Володя Артемьев «Саас» хамаандалар буоланнар хара маҥнайгыттан бэрт сытыы киирсиилэри көрдөрөн, “А” уонна “Б” группаҕа арахсан эргиир ситиминэн илин-кэлин түһүстүлэр.
Бэрт тыҥааһыннаах киирсии түмүгүнэн финалга бэрт кыранан чорбойон «Оо!» хамаанда чөмпүйүөн аатын сүктэ, анал грамотанан, мэтээлинэн уонна Марина, Жанна Артемьевалар олохтообут анал бириистэринэн наҕараадаланнылар. Иккис бириистээх миэстэни «Дьулуур» хамаанда ылары ситистэ. Кинилэр анал грамотанан, мэтээлинэн уонна Акулина, Игорь Стручковтар дьиэ кэргэн олохтообут анал бириистэрин туттулар. Үһүс бочуоттаах миэстэҕэ «Эрчим» хамаанда тиксэн грамотанан, мэтээлинэн уонна Акулина, Игорь Стручковтар дьиэ кэргэн олохтообут анал бириистэринэн наҕараадаланнылар.
Маны таһынан анал ааттар туттарылыннылар: «Саамай аҕам саастаах кыттааччы» Егор Афанасьев буолла, «Саамай эдэр кыттааччы» Айаал Протодьяконов, “Бастыҥ оонньооччу” Сайдам Винокуров, “Бастыҥ быраҕааччы” Николай Цыпандин, Лилия Долгунова, Петр Дохунаев. Кинилэр Елена, Олег Стручковтар, Любовь, Андрей Винокуровтар, Сарана Артемьева, Николай Кириллин, Акулина, Игорь Стручковтар дьиэ кэргэттэрин бириистэрин туттулар. Маны сэргэ турнир бары кыттыылаахтарыгар өрөспүүбүлүкэтээҕи керлинг федерациятын сэртипикээттэрэ туттарылыннылар.
Күрэх кэмигэр көрөөччүлэри уонна күрэхтэһээччилэри урукку кэми санатан, олохтоох култуура дьиэтин кэлэктиибэ сылыбаарга оргуйбут итии чэйинэн, кофенан, сахалыы алаадьынан күндүлээтилэр. Сылаас астаах атыы тэриллэн мустубут дьон үөрэ-көтө атыылаһан аһаатылар.
Бу курдук Балыктаахха керлинг бастакы күрэҕэ үрдүк тэрээһиннээхтик ыытыллыбытын бары кыттааччылар уонна көрөөччүлэр астынан туран бэлиэтээтилэр, олуһун сэҥээрдилэр. Варвара, Кузьма Березкиннар күрэхтэһии олус үчүгэйдик ааспытыттан астыммыттарын биллэрэн махталларын тиэртилэр.
Мария Захарова.
