Муус устар 27 күнүгэр Балыктаахха олохтоох култуура дьиэтигэр Саха Өрөспүүбүлүкэтин күнүнэн, Аан дойдуга үҥкүү күнүн уонна Күөх Маай бырааһынньыгын көрсө «Үҥкүү кэрэ ыллыгынан» диэн үөрүүлээх тэрээһин буолан ааста.
Тэрээһин үөрүүлээх чааһыгар хуор толоруутугар Иван Брызгалов тылыгар, Владимир Кузьмин «Сахам сирэ» уонна Павел Габышев тылыгар, Галина Шахурдина матыыбыгар «Балыктаах киэһэтэ» ырыалары долгуйа иһиттибит.
Кулууп дириэктэрэ Любовь Кычкина тэрээһини эҕэрдэ тылынан аста уонна нэһилиэкпит үбүлүөйдээх саастарын туолбут ытык-мааны бэтэрээннэрбитигэр эҕэрдэ суруктары, анал бэлиэни 85 сааһын туолбут Марфа Габышеваҕа, Дария Максимоваҕа, 65 сааһын туолбут Антонина Прибылыхха, Александр Габышевка, 60 сааһын туолбут Евдокия Дьяконоваҕа, Анна Протодьяконоваҕа туттарда. Үөрүүлээх чааһы Вера Фадеева Леонид Попов тылыгар, Трофим Семенов матыыбыгар «Саныыбын төрөөбүт алааспын», трио толоруутугар Анна Барашкова «Мин дойдум» ырыанан, оскуола кэлэктиибин ансаамбылын толоруутугар Василий Гоголев тылыгар, Күннэйэ Цыпандина матыыбыгар «Балыктааҕым – мин дойдум» ырыанан киэргэттилэр.
Бу киэһэ мустубут бөһүөлэк олохтоохторо астына-дуоһуйа «Звездочка» уһуйаан иитиллээччилэрин (сал.Елена Стручкова), «Ыллыкчаан» оҕо образцовай үҥкүү ансаамбылын (сал.Христофор Рожин), «Доруобуйа» түмсүү (сал.Марфа Ноговицына), «Эрэл» түмсүү (сал.Парасковья Бродникова), «Талба» үҥкүү кэлэктиибэ (сал.Сардаана Стручкова), «Мичээр», «Үрүйэ» кэлэктииптэр (сал.Лилия Долгунова) кыттыылаах бииртэн биир кэрэ, сонун үҥкүүлэрин киэн тутта, долгуйа-астына көрдүлэр, ытыстарын тыаһынан биһирээбиттэрин биллэрдилэр.
Үҥкүү киэһэтэ сыл ахсын салҕана турарыгар, көлүөнэлэринэн үҥкүү бөлөхтөрүн үҥкүүһүттэригэр, бу сэргэх тэрээһин тэрийээччилэригэр истиҥ махтал тылларын анаатылар. Олохтоохтор социальнай ситимҥэ Балыктаах бөһүөлэгэр араас сылларга үлэлээн ааспыт үҥкүү салайааччыларын Галина Михайлованы, Владимир Никифоровы, Валерия Михайлованы, Сардаана Стручкованы, Христофор Рожины о.д.а. үтүө тылынан аҕыннылар. Үөрүүлээх үҥкүү киэһэтин Татьяна Стручкова уонна Любовь Кычкина иилээн-саҕалаан ыыттылар.
Дьоро киэһэ кыттыылаахтарыгар туһаайан дьоҥҥутун-сэргэҕитин бу курдук куруук үөрдэ-көтүтэ, Балыктааххытын ааттата сылдьыҥ диэн баҕа санааларын тиэртилэр.
Мария Захарова,
Балыктаах.
