Тохсунньу 20 күнүгэр Мэҥэ Хаҥалас улууһун баһылыга Дмитрий Тихонов 2023 сыллаах үлэтин отчуотун Балыктаах нэһилиэгинэн түмүктээтэ. Отчуот култуура киинигэр улуус гимнинэн саҕаланна. Манна улуус управлениеларын, тэрилтэлэрин салайааччылара, Ил Түмэн дьокутаата, Сис кэмитиэт бэрэссэдээтэлэ Андрей Находкин, Уус Алдан Бороҕоннооҕу уокуругуттан Ил Түмэн дьокутаата Геннадий Васильев, улууспут дьокутааттарын сэбиэтин бэрэссэдээтэлэ Иннокентий Андросов кыттыыны ыллылар.
Нэһилиэк баһылыга Александр Куприянов иилээн-саҕалаан ыытта.
Дмитрий Иванович 2023 сылга улууска ыытыллыбыт үлэни-хамнаһы сиһилии сырдатта.
Бастакынан култуура дьиэтин дириэктэрэ Любовь Кычкина саҥа култуура дьиэтэ тутулларыгар 2023 сылга былааннаах үлэ ыытыллан бырайыага оҥоһуллубутун иһитиннэрдэ, экспертиза өттүгэр улуустан көмө баар буолуо дуо диэн ыйытта.
Сорох боппуруостар суругунан киирбиттэр.Тумулга гаас заправката тоҕо үлэтин тохтотто, “Арыы Тиит” аллараа бөһүөлэгин электрическай уотун таһыма үрдүөн сөп дуо, гаас киириитигэр туох үлэ барарый, бүгүҥҥү күҥҥэ туһаныллыбакка турар сирдэртэн Сыымахха улахан роботизированнай комплекс үлэҕэ киирэринэн онно сир бэриллэрин туһунан, анал байыаннай дьайыыга сылдьар дьоҥҥо туох көмө оҥоһуллубутун, Өлүөнэ муостатын тутуутугар нэһилиэнньэттэн үлэҕэ ылыахтара дуо, элбэх оҕолоохторго улуус киинигэр Аллараа Бэстээххэ сири тоҕо биэрбэккит, о.д.а. ыйытыылар киирдилэр.
Таксист Илья Бродников ходуһа сири кэҥэтэргэ, кэпэрэтиип үлэһиттэрин хамнастыырга киллэрбит этиилэрин сэргээтилэр. Учуутал Светлана Габышева гаас киириитэ хойутуур түгэнигэр киин систиэмэҕэ холбонорго, уот остоолболоро эргэрэн сууллар кутталлаахтарын, саҥа оскуола тымныытын, эргэрбит хочуолунайы өрөмүөннүүргэ эттэ. Култуура үлэһитэ Дария Андросова “Сүрэх тыа” түөлбэ “Юпитер” чааһынай тэрилтэттэн ОДьХХ тэрилтэҕэ бэриллибитин чуолкайдаста. Оскуола тырахтарыыһа Петр Кычкин тыал охторбут мастарыгар көҥүл көрдүүр. Өрүс кумаҕа бүрүйэрин суотугар оттуур сир сыл аайы кыччыы турарын, дулҕалаах, талахтаах сирдэри астаран ыраастыырга хоту эҥэргэ этэрээт баара буоллар диэн баҕа санаатын тиэртэ. “Хоту” ТХПК салайааччыта, улуус дьокутаата Иван Максимов тэриллибитэ ырааппыт кэпэрэтиип хотонун үлэһиттэригэр социальнай бакыаттаах хамнаһы быһаарарга баҕа санаатын тиэртэ.
Быйыл Мэҥэ нэһилиэгэр Аҕа сыла биллэриллибит. Түмүккэ нэһилиэк баһылыга Александр Валерьевич улуус баһылыгар Дмитрий Ивановичка, улуус дьаһалтатыгар өйөбүллэрин, көмөлөрүн иһин нэһилиэгин дьонун аатыттан махталын тиэртэ. Нэһилиэнньэ ыытыллыбыт үлэни үчүгэйинэн сыаналаата.
Улуус дьокутааттарын сэбиэтин бэрэссэдээтэлэ Иннокентий Андросов олохтоохтор сөптөөх боппуруостары туруорсубуттарын бэлиэтээтэ. Дьон бэйэлэрэ төрөөбүт-үөскээбит сирдэригэр олохсуйан сайыннаралларыгар оскуолаттан саҕалаан кэнчээри ыччаты элбэх сүөһүлээх, сылгылаах дьон баай дьон буолаллар диэн өйгө-санааҕа иитэр наадатыгар сүбэлээтэ итиэннэ 50 кыраадыс тымныыны аахсыбакка кэлэн кыттыыны ылбыт олохтоохторго махтанна.
Отчуоту 54 киһи иһиттэ.
Марелла Баишева.
