Кулун тутар 20 күнүгэр Балыктаах бөһүөлэгэр «Доруобуйа» уопсастыбаннай түмсүү тэриллибитэ 20 сыллаах үбүлүөйүнэй бэлиэ күнүгэр аналлаах тэрээһин олохтоох култуура дьиэтигэр буолан ааста.
Үөрүүлээх күнү «Ыллыкчаан»оҕо үҥкүү образцовай ансаамбыл орто бөлөҕүн кыргыттарын толорууларыгар «Эрэкэ-дьэрэкэ» үҥкүүнэн (сал. Алина Говорова) арыйдылар. Ыҥырыылаах ыалдьыттарын, нэһилиэк олохтоохторун, биир дойдулаахтарын «Доруобуйа» түмсүү Далбар Хотуттара «Эҕэрдэ үҥкүүтүнэн» уруйдаан көрүстүлэр.
Түмсүү 20 сыл устата үгүс ситиһиилэрин, көхтөөх үлэтин туһунан кылгастык түмсүүбүт салайааччыта, Саха Өрөспүүбүлүкэтин үөрэҕириитин, Саха Өрөспүүбүлүкэтин социальнай өҥөнү оҥорууга туйгунп, РФ уопсай үөрэхтээһиҥҥэ Бочуоттаах үлэһитэ, СӨ физическэй култууратын бастыҥ уопсастыбаннай инструктора Марфа Иннокентьевна Ноговицына билиһиннэрдэ. Көрөөччүлэргэ анаан чөл олоҕу тутуһарга, доруобуйаны тупсарынарга ыҥыран «Доруобуйа» түмсүү кыттыылаахтара үөрэ-көтө чэбдигирдэр хамсаныылары оҥорон көрдөрдүлэр. «Ыллыкчаан» ансаамбыл салайааччыта Алина Говорова үөрүүлээх күнүнэн «Дьүкээбил уота» үҥкүүтүнэн эҕэрдэтин тиэртэ. Салгыы дьоро күҥҥэ бэйэлэрэ тиктибит мааны таҥастарын кэтэн «Доруобуйалар» сыанаҕа тахсан хааман наскылдьыйбыттарын мустубут ыалдьыттар ытыс тыаһынан биһирээбиттэрин биллэрдилэр.
«Мэҥэ нэһилиэгэ» тыа сирин түөлбэтин баһылыга Ньургун Габышев «Доруобуйа» түмсүү инники күөҥҥэ сылдьарын, нэһилиэк уопсастыбаннай олоҕор күүс-көмө буолбутун, нэһилиэкпит сайдыытыгар киллэрбит кылааттарын үрдүктүк сыаналаан эҕэрдэ бастыҥын анаата уонна истиҥник махтанан туран «Ил Түмэн» Судаарыстыбаннай мунньах, оройуон баһылыгын Дмитрий Тихонов грамоталарын, «Мэҥэ нэһилиэгэ» тыа сирин түөлбэтин Эҕэрдэ суруктарын туттартаата. Истиҥ эҕэрдэлэрин, бары үтүө санааларын Маттатааҕы социальнай геронтологическай еиин салайааччыта Александр Куприянов, Саха Өрөспүүбүлүкэтин көхтөөх уһун үйэлэнии лиидэрэ, Үһүс көлүөнэ оскуола салайааччыта, Мэҥэ нэһилиэгин кураатара Людмила Заровняева‒Стручкова улуус бэтэрээннэрин сэбиэтин салайааччыта Евдокия Решетникова грамоталарын, нэһилиэк түөлбэлэрин олохтоохторун ааттарыттан түөлбэ салайааччылара, тэрилтэлэр салайааччылара, «Эрэл» уопсастыбаннай түмсүү аатыттан Татьяна Цыденжапова, нэһилиэк бэтэрээннэрин сэбиэтин салайааччыта Елена Кычкина, олохтоох култуура киинин кэлэктиибин аатыттан дириэктэр Любовь Кычкина истиҥ эҕэрдэлэрин, мэлдьи өйөбүл буолалларын иһин махтал сылаас тылларын анаатылар, өйдөбүнньүк бэлиэни бэлэх ууннулар. Төҥүлүттэн анаан кэлбит биир дойдулаахпыт Евдокия Баишева «Доруобуйа» түмсүү нэһилиэк култуурунай олоҕор дьоһун кылаатын киллэрэрин, чөл олоҕу көҕүлүүрүн бэлиэтээн эттэ. Араас сылларга кыттан кэлбит уонна билигин дьарыктана сылдьар дьоммутугар ис сүрэхтэн эҕэрдэлээн туран аймах-билэ дьоно өйдөбүнньүк бэлэхтэрин туттардылар. «Доруобуйа» түмсүү Далбар Хотуттарыгар махталларын бэлиэтин, тапталлаах оҕолорун ааттарыттан тыыннаах сибэкки дьөрбөлөрүн туттардылар.
«Доруобуйа» түмсүү кэлэктиибин аатыттан истиҥник махтанан туран 20 сыл салайан, сирдээн кэлбит ытыктыыр салайааччыларыгар Марфа Иннокентьевнаҕа, бу сыллар тухары бииргэ үлэлэспит нэһилиэкпит баһылыктарыгар Ирина Черкашинаҕа,Александр Куприяновка, сахалыы таҥаспытын тиктиигэ көмө буолбут, мэлдьи сүбэ-ама биэрэр киһибитигэр Светлана Кардашевскаяҕа, кулууп дириэктэригэр Любовь Кычкинаҕа махтал сылаас тылларын анаан туран сэмэй бэлэхтэрбитин туттардыбыт.
Үөрүүлээх тэрээһини ырыанан-тойугунан Дария Андросова, Рима Фадеева, «Сайдыына» вокальнай ансаамбыл киэргэттилэр. Бу үөрүүлээх түгэммитинэн тэриллибит фуршекка кыттыыны ылбыт ыалдьыттарбыт «Доруобуйа» түмсүү өссө да сайда-үүнэ турарыгар, элбэх батыһааччылары, өрүү да бу курдук нэһилиэккитигэр күүс-көмө буола туруҥ диэн баҕа санааларын тиэртилэр.
Мария Захарова. Балыктаах
