Кулун тутар 21 күнүгэр биир дойдулаахпыт, Бэдьимэ орто оскуолатын выпускнига, байыаннай дьайыы кыттыылааҕа, «Эр санааланыы» уордьан кавалера Пётр Петрович Баишев сырдык кэриэһигэр ытыыга комплекснай ыспартакыйаада ыытылынна.
Күрэх аһыллыытыгар Пётр Баишев ийэтэ Полина Павловна, эдьиийэ Александра Петровна, чугас аймахтара, улуустааҕы үөрэх управлениетын исписэлииһэ Милан Илларионов, Майатааҕы Ис дьыала отделениетын начаалынньыга, полиция майора Владимир Попов кыттыыны ыллылар. Сүрүн судьуйанан Александр Сидоров үлэлээтэ.
14 толору хамаанда кытынна. Биирдиилээн ытыыга түмүк маннык буолла. Кыргыттарга бастакы миэстэ Нарыйа Карпова (Хара), иккис Света Никифорова (Лоомтука), үһүс Сайаана Андросова (Бэдьимэ) буоллулар. Кыргыттарга анал бириистэри Петр Баишев бииргэ үөрэммит оҕолоро туруордулар, доҕотторо Иннокентий Аргунов, Тимофей Аргунов туттардылар.
Уолаттарга бастакы Эрчим Кириллин (Хара), иккис Ваня Прокопьев (Лоомтука), үһүс миэстэ Арчын Захаров (Бэдьимэ) буолары ситистилэр. Анал бириистэри Бэдьимэ олохтоох дьаһалтатын баһылыга Пётр Андросов туттарда.
Анал ааттар туттарыллан оҕолор үөрүүлэрэ өссө үксээтэ. Н.Д.Неустроев аатынан Бэдьимэ орто оскуолатын анал бирииһин саамай кыра саастаах кыттааччылар Родмай Дордосов (Моорук), Катя Аржакова (Ф.Г.Охлопков аатынан Майа), биир дойдулаахпыт, байыаннай дьайыы кыттыылааҕа Иван Сергучёв аатынан анал бирииһи аймахтара Алтантан Албан Сидоровка уонна балтыларыгар Сайаана Андросоваҕа туттардылар.
«Кыайыыга дьулуурун иһин» Ис дьыала органнарын бирииһин Павловскайтан Айыллаана Филиппова уонна Бэдьимэттэн Айсен Игнатьев ыллылар. Петр ийэтин кытта бииргэ үөрэммит доҕотторо анал бириистэрин Тиэлиги, онтон аҕатын одноклассниктара Бэдьимэ оскуолатын хамаандаларыгар туттардылар.
Хамаанданан абсолютнай күрэхтэһиигэ бастакы миэстэҕэ Хара, иккискэ Төҥүлү үһүскэ Лоомтука оҕолоро таҕыстылар. Хамаандалар бары Пётр Баишев дьиэ кэргэнин уонна аймахтарын бириистэрин тутан үөрдүлэр. Кыайыылаах Хара оскуолатын хамаандата көһөрүллэ сылдьар куубагынан наҕараадаланна.
Түмүккэ күрэхтэһиини көҕүлээн тэрийбит дьоҥҥо, чуолаан Фёдор Константинович, Екатерина Прокопьевна Баишевтарга, бириистэри туруорбут доҕотторугар, улуустааҕы Ис дьыала отделыгар, Бэдьимэ дьонугар-сэргэтигэр, оскуолатын кэлэктиибигэр күрэхтэһии кыттыылаахтара ис сүрэхтэриттэн махталларын биллэрдилэр. Тэрээһин сылын аайы Пётр Петрович Баишев аатынан дойдутугар Бэдьимэҕэ ыытылларыгар быһаарыы уопсай сүбэнэн ылылынна.
Екатерина Попова. Бэдьимэ
