Улуус баһылыгын отчуота бу күн Мэлдьэхси нэһилиэгинэн түмүктэннэ. Манна олохтоохтор отчуоттуур бөлөҕү саҥардыы өрөмүөннэнэн үлэҕэ киирбит, мэктиэтигэр сибиэһэй мас сытынан дыргыйар сып-сырдык, сып-сылаас култуура киинигэр итии чээй, үссэнэргэ алаадьы бэлэмнээн көрүстүлэр. Валерий Никифоров баһылыктаах нэһилиэк бүттүүнэ көхтөөхтүк турунан саҥардан оҥорбут кулууба дьэ, кырдьык, “сынньана кэлиҥ” диирдии, дьону түмэр киин буоларыгар киһи саарбахтаабат.
Суола олохтоохторо саҥа көрүҥүнэн таҥыллан тиэрдиллибит улуус баһылыгын Дмитрий Тихонов дьаһалта 2024 сыллаах үлэтин отчуотун сэҥээрэн иһиттилэр. Ол кэннэ кинилэр: «Мүрү» суол хаһан оҥоһулларын, Аллараа Бэстээххэ элбэх оҕолоох ыалларга бэриллибит сир учаастактарын уота-күөһэ, суола-ииһэ, гааһын ситимэ хаһан киирэрин, эдэр исписэлиистэргэ анаан толору хааччыллыылаах уопсай дьиэ тутуутун, үүт харчытын үрдэтиини, дьарыктаах буолуу киинин нөҥүө оҕолор сайыҥҥы сынньалаҥнарыгар хамнастаах үлэлииллэрин тэрийиини, кэлии дьону, миграннары хонтуруоллааһыҥҥа туох үлэ ыытылларын, уот ситимин кыамтата мөлтөҕүн, эбиитин хамсыы турарын ыйытыы, этии быһыытынан тиэртилэр.
Үтүөлээх тириэньэр Василий Куприянов эдэр кэскиллээх дуобатчыт Прокопий Говоров салгыы Аан дойду таһымыгар күрэхтэһэн сайдарыгар, таһымын үрдэтэригэр дьаһалта өттүттэн өйөбүл баар буолуон баҕарарын эттэ. Олохтоох оскуола 30 сыл устата күттүөннээх өрөмүөнү барбатаҕын ахтан, болҕомтоҕо ылалларыгар көрдөстө. Кыра нэһилиэктэр эстибэттэрин, дьон, ыччат олохсуйа хааларын туһугар үчүгэй оскуола, учууталларга, эдэр исписэлиистэргэ толору хааччыллыылаах дьиэлэри тутуу үгүһү быһаарарын бэлиэтээтэ.
Биэлсэр-акушер пуунун медсиэстэрэтэ Ирина Охлопкова саҥа толору хааччыллыылаах балыыһа тутуллан, үлэлииргэ үчүгэй усулуобуйа тэриллибитигэр махтанарын эттэ. Нэһилиэнньэ бэтэринээр өҥөтүн иһин төлөһүүтүгэр ханнык эмэ судургу ньыманы булуохха баара диэн Сахайаана Степанова санаатын тиэртэ.
Мэлдьэхси олохтоохторугар олохтоох бэйэни салайыныыга тахсаары турар уларыйыылар, “КлиКра сокуонун” туһунан норуот дьокутаата, Ил Түмэн Сиргэ сыһыаннаһыыга, айылҕа ресурсаларыгар уонна экологияҕа сис кэмитиэтин бэрэссэдээтэлэ Андрей Находкин сиһилии быһаарда.
Култуураларын дьиэтэ сиҥнэйэн, сабыллан, үс сыл устата дьон мустар тэрээһиннэрин ыытыыга успуорт саалатыгар дьукаахтаһан кэлбиттэрин итиэннэ күүскэ турунан өрөмүөннээн түмүктээбиттэрин нэһилиэк баһылыга Валерий Никифоров иһитиннэрдэ. Тыа хаһаайыстыбатынан дьарыктанааччылары өйөөһүҥҥэ уларыйыылар киирээри туралларынан дьоммутун-сэргэбитин кытта сүбэлэһиэхпит диэтэ. Муҥхалыыр күөллэрэ суох буолбутунан, Муохтаахха, Бэрдьигэстээххэ уу киирэрэ наадатын, уот кыамтатын үрдэтиигэ, суолу оҥорууга кэккэ санааларын үллэһиннэ.
Улуус баһылыгын отчуотугар манна 52 киһи сырытта, сэргээтэ.
Февронья ОХЛОПКОВА.
