Саха Өрөспүүбүлүкэтигэр алтынньы 1 күнүгэр диэри 533 баһаар түбэлтэтэ таҕыста. Былырыын баччаҕа 521 баһаар буолбут. Быйылгы сылга 27 киһи, онтон 6 оҕо уот буруотуттан тумнастан өллүлэр, былырыын баччаҕа 19 киһи суорума суолламмыта, 1 оҕо өлүүлээх баһаар буолбута.
Мэҥэ Хаҥалас улууһугар алтынньы 24 күнүгэр диэри 40 баһаар түбэлтэтэ таҕыста. Былырыын баччаҕа 33 баһаар буолбут. Быйыл баһаарбыт элбээтэ, чааһынай олорор дьиэлэргэ, кини тутууларыгар, гарааска, баанньыкка 21 буолла ‒ уопсай ахсаантан 52,5 %.
Баһаары утары охсуһар судаарыстыбаннай сулууспа үлэһиттэрэ сэрэхтээх буолуу быраабылаларын, ирдэбиллэри хас биирдиибит тутуһара, толороро наадалааҕын бэлиэтиибит.
Гарааска хайаан да собуокка оҥоһуллубут оһох туруоруллуохтаах, хайаан да анал сэртипикээттээх буолуохтаах, бэйэ оҥоһуу оһох баһаарынай ирдэбилинэн, быраабыланан, сокуонунан көҥүллэммэт.
Оттуллар оһохтоох ыаллар оһоххут билиитэтэ бүтүн, хайдыыта суох буолуохтаах. Оһох иннигэр ылтаһын хайаан да баар буолуохтаах. Маһы кыстаамаҥ, бөҕү-саҕы кутумаҥ. Оттуллан турар оһоҕу быраҕаҥ барымаҥ. Көрүүтэ-истиитэ суох хаалларымаҥ. Гаас оһоҕу оҕо туттарын бобуҥ. Оҕо оонньуута буолбатахын өйдөтүҥ. Дьиэҕитигэр гаас сыта баар буоллаҕына хайаан да дьиэҕитин салгылатыҥ уонна суһаллык тустаах гаас үлэһиттэригэр эрийэн этиҥ. 04 сулууспаны ыҥыран көрдөрүҥ, бэйэҕит өрөмүөннээмэҥ, гаас оһоҕун тыытымаҥ.
Гарааска, дьиэҕэ баһаартан сэрэхтээх буоларга уонна суһал көмөнү оҥорорго баһаарынай тэрил (извещатель ‒ АДПИ), огнетушитель хас биирдии дьиэҕэ, гарааска баар буолуохтааҕын сүбэлиибит.
Кыра оҕолору көрүүтэ-истиитэ суох дьиэҕэ хаалларымаҥ. Оҕо илиитэ тиийэр, көстөр сиргэ испиискэни, зажигалканы уурумаҥ. Табахтыыр дьон мээнэ табаххытын быраҕымаҥ. Эһиги бэйэҕит эрэ эмсэҕэлээбэккитин өйдөөҥ. Көмпүүтэри, ноутбугу күнү быһа холбуур кэммигитигэр, дьиэҕитигэр электроуот ситимин күүскэ ноҕоруускалаабат инниттэн собуокка оҥоһуллубут фильтрдары, удлинителлэри, аптамаат предохранителлэри эрэ туһаныҥ. Электрическэй прибордаргыт, электроборуобат, эрэсиэккэ алдьаныылаах буоллаҕына уларытыҥ.
Олорор дьиэҕэ баһаарынай ирдэбили толоруу хас биирдиибит эбээһинэһэ буоларын өссө төгүл санатабыт.
Екатерина Яковлева, Мэҥэ Хаҥалас улууһун 20 №-дээх этэрээтин сэрэтэр үлэҕэ инструктора.
