Бырабыыталыстыба 2025 сыллаах үлэтин отчуота иккис бөлөххө олунньу 18 күнүгэр күн бастакы аҥаарыгар Бүтэйдээх нэһилиэгэр турда. Бүгүн отчуоттуур бөлөҕү өрөспүүбүлүкэ олох-дьаһах хомунаалынай хаһаайыстыбаҕа уонна энергетикэҕэ миниистирин бастакы солбуйааччы Аян Кириллин салайда.
Нэһилиэк баһылыга Айаан Чичахов олохтоохтору отчуоту болҕойон истэллэригэр ыҥырда. Улуус баһылыгын бастакы солбуйааччыта Гаврил Толстяков өрөспүүбүлүкэ ситэриилээх былааһын оччуота улууска үс бөлөҕүнэн бэҕэһээҥҥи күнтэн үлэлии сылдьарын иһитиннэрдэ уонна бүгүҥҥү бөлөх састаабын билиһиннэрдэ.
Отчуоттуур бөлөх дакылаатын истии иннинэ Аян Кириллин Бүтэйдээх орто оскуолатын математикаҕа учууталыгар Татьяна Петровна Ефимоваҕа СӨ үөрэх уонна наука министиэристибэтин Махтал суругун үөрүүлээхтик туттарда.
Олохтоохтор Өлүөнэ өрүһү туоруур муоста тутуутун, «Абалаах» өрөспүүбүлүкэ суолун Өлөчөй-Бүтэйдээх, Табаҕа учаастактарын өрөмүөнүн, сэрии сылын оҕолоругар өйөбүл көрүҥнэрин, тыа сирин сайдыытыгар туох бырагыраама баарын туоһуластылар. Улуустааҕы киин балыыһа нэһилиэнньэни кытта ыкса үлэлэһэрин бэлиэтээн эттилэр. Этиилэргэ нэһилиэнньэ өрөспүүбүлүкэ ситэриилээх былааһа Өлөчөй-Бүтэйдээх суолун өрөмүөнүгэр, Бүтэйдээххэ саҥа кулууп, оҕо уһуйаана тутуллууларыгар, тыа сирдэрин нэһилиэктэрин каадырдарынан хааччыйыыга үлэҕэ, олохтоохтор урукку сыллартан туруорсар быһаарыллыбакка сылдьар боппуруостарыгар ордук болҕомто ууран үлэлииригэр ыҥырдылар. Бүтэйдээх орто оскуолатын историяҕа учуутала, Бүтэйдээх нэһилиэгин түмэлин салайааччыта Вячеслав Кириллин нэһилиэккэ ыччакка үлэлииригэр-хамсыырыгар толору усулуобуйа, ол курдук уопсай дьиэ, сибээс бары көрүҥэ баарын эттэ. Кини ыччат дьону нэһилиэк сайдыытыгар бииргэ кэлэн үлэлэһэллэригэр ыҥырда.
Отчуоттуур бөлөх киирбит ыйытыыларга хоруйдары биэрдэ, кэккэ боппуруостарга салҕыы үлэлэһэрин иһитиннэрдэ.
Марелла Баишева.
