Бүгүн, кулун тутар 1 күнүгэр, «Таала күөл» сынньалаҥ пааркатыгар Арассыыйаҕа Норуоттар сомоҕолоһууларын, СӨ Култуура, Майа сэлиэнньэтигэр Удьуор утумун сылларыгар аналлаах «Чөл Майа» норуот күүлэйэ тэрилиннэ.
Үһүс сылын оҕо-аймах, дьон-сэргэ сибиэһэй салгыҥҥа сынньанар, сэргэхсийэр сирин сэлиэнньэ оскуолаларын оҕолоро, кэлэктииптэрэ, тэрилтэлэр үлэһиттэрэ көхтөөх кыттыыларынан, биир сомоҕо санааларынан, күүстэринэн оҥордулар.
Сандал саас маҥнайгы күнүгэр паарка арыллар үөрүүлээх тэрээһин ыалдьыттарыгар араас кыраһыабай хаар, муус оҥоһуктары, хаҥкылыыр сири бэлэмнээтилэр, араас үрдүктээх сыырдар турдулар уонна хараҥа кэмҥэ сырдатар уот холбонно. Бырааһынньыкка элбэх көрдөөх оонньуулар, хорчуопка, эҕэрдэ кэнсиэр, Сомоҕолоһуу сылыгар аналлаах араас омук бөлүүдэлэригэр сэргэх күрэс, күүстээх эр бэртэригэр баҕанаҕа ыттыы, «банаанҥа» уонна акка хатааһылааһын тэрилиннэ.
Андрей Находкин, СӨ Ил Түмэн Судаарыстыбаннай Мунньаҕын Сир сыһыаннаһыыларыгар, айылҕа ресурсаларыгар уонна экологияҕа кэмитиэтин бэрэссэдээтэлэ:
– Бу күн сэлиэнньэ олоҕун устуоруйатыгар суруллар улахан суолталаах бэлиэ түгэн тосхойдо. Саха Өрөспүүбүлүкэтин Ил Түмэн Судаарыстыбаннай Мунньаҕын 2025 сыл бэс ыйын 26 күннээҕи 2861-С 397-VII №-дээх сокуонунан Мэҥэ Хаҥалас улууһун Майа сэлиэнньэтин сиригэр-уотугар арыгы бородууксуйатын атыытын толору бобуу күүһүгэр киирдэ. Былырыын сэлиэнньэ баһылыга Алексей Неустроев олохтоохтор, дьокутааттар, уопсастыбаннас барыта өйөөннөр, Майа чөл олоҕу тутуһуохтаах диэн биир санаанан салайтаран, Ил Түмэн пленарнай мунньаҕар киирэн боппуруоһу туруорбута. Ил Түмэн дьокутааттара Майа олохтоохторун баҕа санааларын өйөөн, бигэргэтэн тураллар. Бүгүҥҥү бэлиэ түгэҥҥэ СӨ Ил Дарханын Айсен Николаев Майаҕа арыгы атыытын толору бобор дьаһалын дьон-сэргэ ортотугар ааҕан, иһитиннэрэн баран үөрүүлээх быһыыга-майгыга, дохсун ытыс тыаһынан Алексей Иннокентьевич бастакы солбуйааччытыгар Дмитрий Игнатьевка туттардым.
Биллэн турар, бу улахан дьаһал сэлиэнньэ өйөбүлэ уонна биһиги үүнэр кэнчээри ыччаттарбыт инники кэскиллэрэ буолар. Ол иһин үтүө үгэскэ кубулуйбут Таала күөлгэ ыытыллар сааскы барааһынньык бүгүн өссө улахан суолталанна, умнуллубат түгэннээх буолла диэн тус бэйэм сыаналыыбын, – диэн иһитиннэрдэ.
Дьиэ кэргэн уонна оҕо-аймах сынньанарыгар, көрүлүү оонньууругар биир кэрэ көстүүлээх тупсаҕай паарка үлэтин саҕалаабытыгар астынан, үөрэн-дуоһуйан тураннар олохтоохтор, ыалдьыттар махталларын, ытыктабылларын тиэрдэллэр.
Иван Лукин.
oplus_0
oplus_0
oplus_262144
oplus_262144
oplus_262144
oplus_262144
oplus_262144
oplus_0
oplus_4456448