“Азия оҕолоро” Норуоттар икки ардыларынааҕы успуорт оонньуулара Дьокуускай куоракка бэс ыйын 26 күнүттэн от ыйын 7 күнүгэр диэри киэҥ далааһыннаахтык, үрдүк таһымҥа ыытылынна. Оонньуу Саха Өрөспүүбүлүкэтин бастакы бэрэсидьиэнэ Михаил Николаев көҕүлээһининэн 1996 сылтан ыытыллар.
Барыта Азия араас дойдуларыттан 2700 кэриҥэ оҕо 24 дойдуттан уопсайа 30 хамаанданан кыттыыны ылла. Ол иһигэр 805 спортсмен, оттон Мэҥэ Ханалас улууһун 10 нэһилиэгиттэн 18 спортсмен оҕолор ситиһиилээхтик кыттан, уопсайа 10 мэтээли: 5 кыһыл көмүс, 3 үрүҥ көмүс, 2 боруонса мэтээли аҕалбыттара. Маны таһынан улууспутуттан 125 волонтер, «Азия оҕолоро – 2024» спортивнай оонньуу уотун аҕалыыга 18 спортсмен сүүрбүтэ.
Кыайыы кынаттаммыт, ситиһии эҥээрдэммит спортсмен оҕолору, тириэньэрдэри, бары кыттааччылары үөрүүлээх быһыыга бэлиэтиир дьоро тэрээһин бүгүн, от ыйын 16 күнүгэр, Аллараа Бэстээх Г.Г.Колесов аатынан Олоҥхо Дьиэтигэр ыытылынна. Тэрээһиҥҥэ спортсменнар, тириэньэрдэр, төрөппүттэр, ыҥырыылаах ыалдьыттар, салайааччылар сааланы толору муһуннулар.
Улуус баһылыга Дмитрий Тихонов: “Улууспут бастыҥ ыччаттара, инники эрэллэрбит, Норуоттар икки ардыларынааҕы VIII “Азия оҕолоро” күрэхтэһииттэн, төрөөбүт дойдугутугар үтүө түмүктээх кэлбиккитин чиэстиир күммүт үүннэ. Бу оонньуу эһиги улахан успуорка инники хардыыгыт, бастакы саҕалааһыҥҥыт буоллун», – диэн алгыс тылын анаата. Эдэр спортсменнар салгыы сайдалларыгар үбүнэн-харчынан өйөөбүт тэрилтэ салайааччыларыгар, урбаанньыттарга махтанна. Призердарга, кинилэр тириэньэрдэригэр харчынан бириэмийэни, оонньуулар уоттара улууска кэлэригэр сүүрбүт спортсменнарга Махтал суруктары туттарда.
Эҕэрдэ тылларга Мэҥэ Хаҥалас улууһун оҕо ыччат успуорка оскуолатын дириэктэрэ Петр Илларионов: “Сахабыт сирин сүүмэрдэммит хамаандатын мэтээлин 12 бырыһыанын биһиги улууспут оҕолоро ылбыттарынан киэн туттабын. Оонньуулар таһымнара сырыы ахсын үрдээн иһэрин көрөн үөрэбин», – диэтэ. Мэҥэ Хаҥалас улууһун Василий Петрович Уваров аатынан олимпийскай бэлэм оскуолатын дириэктэрэ Дьулустаан Захаров: “Мэҥэ Хаҥалас оҕотун успуорда үрдүк таһымнааҕын көрдөрдө. Бүгүн аҕалбыт мэтээллэргитинэн уоскуйан хаалымаҥ, өссө үрдүк сыаллары туруорунан, Олимп чыпчаалын дабайаргытын хараххытыгар ойуулаан көрүҥ, ону ситиһэргэ дьулуһуҥ”, – диэн оҕолорго баҕа санаатын эттэ.
Улуус баһылыга В.П.Ларионов аатынан Майа орто оскуолатын үөрэнээччитигэр Максим Семеновка, кылыыга 41 м 40 см кылыйан рекорд олохтообутун иһин 50000 солкуобай суумалаах туоһу суругу, кини тириэньэригэр Игорь Скрябиҥҥэ 20000 солкуобайдаах сэртипикээти туттарда. “Чүүйэ” МУП салайааччыта Аркадий Лукин төрүт ыстаныылар муҥутуур кыайыылааҕар диэн Максим Семеновка 50000 солкуобай, кини тириэньэригэр Игорь Скрябиҥҥэ 25000 солкуобай суумалаах туоһу суруктары туттарда.
Ити курдук “Фаворит строй-Якутск” ХЭУо салайааччыта Петр Иванов, мас рестлинг Бүтүн Арассыыйатааҕы федерациятын Вице-президенэ Петр Бурнашов, урбаанньыттар Максим Забровскай, Мансур Мубаракшин, хапсаҕайга СӨ успуордун маастара Афанасий Борисов “Азия оҕолоро” спортивнай оонньууларга Мэҥэ Хаҥалас улууһуттан ситиһиилээхтик кыттыбыт спорстменнарга кыһыл көмүс мэтээл иһин 50000 (тириэньэргэ 25000), үрүҥ көмүс мэтээлгэ 30000 (тириэньэргэ 15000), боруонса мэтээлгэ 20000 (тириэньэргэ 100000 солкуобай суумалаах сэртипикээттэри туттардылар.
Оройуон баһылыга Дмитрий Тихонов “Азия оҕолоро” спортивнай оонньууларга Мэҥэ Хаҥалас улууһун аатын ааттатан, улуус чиэһин көмүскээбит спорстменнарга 10000 солкуобай, оҕолору бэлэмнээбит тириэньэрдэргэ 5000 суумалаах сэртипикээттэри туттарда.
Үөрүүлээх чааһы Г.Г.Колесов аатынан «Олоҥхо дьиэтэ» оройуоннааҕы норуот айымньытын киинин уус-уран салайааччыта Айта Васильева иилээн-саҕалаан ыытта. Ырыаһыт Ян Чоросов ылбаҕай ырыатынан ситэрэн-хоторон биэрэн киэргэттэ.
Тэрээһин түмүктүүр чааһыгар Максим Семенов аҕата Леонид Степанович уолун кыайыыга кынаттаабыт тириэньэр Игорь Скрябиҥҥэ ис сүрэҕиттэн махтанан туран, саха быһаҕын бэлэх уунна. Бүгүҥҥү тэрээһинтэн бары үөрэн, астынан тарҕастыбыт. VIII “Азия оҕолоро” оонньуу саҥа саҕахтары арыйдын, успуорт Чыпчаалыгар сирдээтин.
Елизавета Неустроева.
