Бэс ыйын 20 күнүгэр Мэҥэ Хаҥалас улууһун Догдоҥо нэһилиэгин сиригэр-уотугар саха омук уос номоҕо оҥостор национальнай дьоруойбут Манчаары Баһылай төрөөбүт-үөскээбит Арыылаах алааһыгар успуорт национальнай XXII “Манчаары оонньууларын» уотун уматыы үөрүүлээх тэрээһинэ буолан ааста.
Түөрт сылга биирдэ ыытылдар Саха сирин Олимпиадатынан билиниллэр «Манчаары оонньуулара» быйыл от ыйын 7 ‒ 12 күннэригэр ытык Таатта сиригэр ыытыллар.
Оонньуулар уоттарын уматыы үөрүүлээх тэрээһинигэр СӨ Физическэй култуураҕа уонна успуорка миниистирэ Леонид Спиридонов, Мэҥэ Хаҥалас уонна Таатта улуустарын баһылыктара Дмитрий Тихонов, Айаал Бурцев, СӨ Ил Дарханын Аркикаҕа бэрэстэбиитэлэ Александр Акимов, СӨ Ил Түмэнин дьокутаата, «Саха» НКИХ генеральнай дириэктэрэ Олег Марков, буоксаҕа РФ үтүөлээх маастара Василий Егоров, Башкирияттан кэлбит ыалдьыппыт ‒ судаарыстыбаннай уонна уопсастыбаннай диэйэтэл, суруйааччы, скульптор Рафаил Зинуров кыттан эҕэрдэ тылы эттилэр. Тыл этээччилэр Манчаары Баһылай аата устуоруйаҕа киирбит суолун-ииһин ахтан туран, саха омук успуорт төрүт көрүҥнэригэр улахан күрэхтэһиитэ кини аатын сүгэрэ саамай сөптөөҕүн бэлиэтээтилэр.
Быйыл Манчаары Баһылай төрөөбүтэ 220 сылын бэлиэтэнэрин, өбүгэ саҕаттан олохтоммут төрүт оонньууларбытыгар Манчаары Баһылай бэйэтэ олус кыахтааҕын номохтортон билэрбитин, онон бу күрэхтэһии кини аатын сиэрдээхтик сүгэрин, Оонньуулар уоттара бүгүн күммүт саамай муҥутаан уһаан турар күнүгэр сөп түбэһэн умайбыта эмиэ уратылааҕын СӨ Физическэй култуураҕа уонна успуорка миниистирэ Леонид Спиридонов бэйэтин этиитигэр бэлиэтээтэ.
Ыраахтан-чугастан кэлбит ыалдьыттары Догдоҥо нэһилиэгин баһылыга Петр Сивцев көрсөн эҕэрдэтин тириэртэ.
Мэҥэ Хаҥалас улууһун баһылыга Дмитрий Тихонов Оонньуулар уоттарын Таатта улууһун баһылыгар Айаал Бурцевка туттарда. Айаал Семенович Манчаары Баһылай төрөөбүт өтөҕөр уматыллыбыт уоттаах факелы СӨ физическэй култуураҕа уонна успуорка үтүөлээх үлэһитигэр, уоту арыаллыыр бөлөх салайааччытыгар Дмитрий Гороховка туттарда.
‒ Мин Манчаары алааһыгар сүүрбэ сыллааҕыта Манчаары ыспартакыйаадатын эстэпиэтэтин уотун бастаан уматыыга кыттыбытым, ‒ диэтэ Дмитрий Николаевич. ‒ Онтон ылата 32 эстэпиэтэ уотун арыаллаан кэллим. Сахабыт төрүт оонньуулара киэҥник сайдан билигин аан дойдуга киэҥник биллэн тарҕаннылар.
Уоту арыаллыыр бөлөххө чэпчэки атлетикаҕа биллэр сүүрүктэрбит ‒ чэпчэки атлетикаҕа СӨ успуорка маастардара Екатерина Драгунова, Вдадимир Тордуянов, Владимир Находкн, СӨ доруобуйаҕа харыстыбылын туйгуна, өрөспүүбүлүкэтээҕи үгүс күрэхтэһии кыайыылааҕа Алексанлра Мохначевская, өрөспүүбүлүкэ эдэр кэскиллээх сүүрүгэ Мария Дьяконова киирдилэр.
‒ Бүгүн манна бары уу сахалыы саҥараргытын истэн олус үөрдүм уонна ымсыырдым, Уфаҕа сахалыы саҥарар үөрүйэҕи, тылы баһылыыр кыаҕым суох, ол да буоллар, эһиги саҥаҕытын өйдүүбүн. Өр сылларга географияны үөрэтиинэн дьарыктаммытым, онон Манчаары Баһылай саха омук эрэ дьоруойа буолбатаҕын кини олоҕун сиһилии үөрэтэн билэбин, кырдьык иһин охсуһааччы буоларын үрдүктүк сыаналыыбын, эһиги кини аатыгар сүгүрүйэргитин билэбин. Манчаары Баһылай тус бэйэбэр ытыкьыыр чугас киһибинэн буолбутун бэлиэтиибин. Төрөөбүт сиригэр-уотугар, алааһыгар сылдьар баҕа санаам бүгүн туолбутуттан олус долгуйан турабын, ‒ диэтэ Башкирияттан сылдьар киэҥник биллэр уопсастыбаннай диэйэтэл, историческай билим дуоктара, суруйааччы, скульптор Рафаил Зинуров. Кини хас да сыллааҕыта бэйэтэ оҥорбут Манчаары бүүһүн СӨ Ил Түмэнигэр бэлэхтээбит.
Үөрүүлээх тэрээһин, үгэс быһыытынан, Манчаары аарыма бэһигэр сүгүрүйүүнэн, сахалыы оһуокайынан түмүктэннэ.
XXII «Манчаары оонньууларын» уота Мэҥэ Хаҥалас улууһуттан Дьокуускай куоракка тиэрдиллиэҕэ. Салгыы Чурапчынан Тааттаҕа тиийиэҕэ.
Алена Докторова.
