Архитектура хайысхалаах художественнай айар үлэҕэ XX өрөспүүбүлүкэтээҕи күрэх-олимпиада Дьокуускайга кулун тутар 28-30 күннэригэр буолан ааста.
Үөрэнээччилэр дьоҕурдарын тургутар олимпиадаҕа уонна быыстапкаҕа 300 үөрэнээччи кытынна. Түмүк күөн көрсүһүүгэ араас улуустартан уонна Дьокуускай оскуолаларыттан 30 үөрэх тэрилтэтиттэн кытыннылар. Оҕолор араас көрүҥҥэ: уруһуйга, живописька, архитектура композициятыгар, дизайн композициятыгар, черчениеҕэ күөн көрүстүлэр.
Быыстапкаҕа графика, скульптура, макыаты оҥоруу, бырайыагы толоруу курдук, о.д.а. 12 араас көрүҥҥэ 170 үлэни туруордулар. Үлэлэри сирийэн-ырытан П.П.Романов аатынан Дьокуускайдааҕы художественнай училище, М.К.Аммосов аатынан Хотугулуу-Илиҥҥи Федеральнай университет, Култуура, ускуустуба Арктическай институтун преподавателлэрэ, үлэлии сылдьар архитектордар уонна дизайнердар дьүллээтилэр.
Дэкээдэ чэрчитинэн «Төрөөбүт дойдубут архитектурата» диэн оҕолор чинчийэр үлэлэрин конференцията буолла.
Күрэх түмүгүнэн 35 бааллаах Мэҥэ Хаҥалас хамаандата бастакы миэстэҕэ таҕыста. Иккискэ 34 бааллаах Верхоянскай оройуон, үһүскэ 24 бааллаах Нерюнгри улууһа таҕыстылар. Гран-при аатын 39 бааллаах Сунтаар улууһа ылла. Кыайыылаахтарга уонна кыттааччыларга туоһу суруктары, дипломнары туттардылар.
Мэҥэ Хаҥалас чиэһин М.К.Попова аатынан Майатааҕы оҕо ускуустубатын оскуолата (салайааччылар А.М.Константинова, А.Г.Необутов, А.В.Жиркова, Д.Н.Ефимова) уонна М.Е.Попов аатынан Аллараа Бэстээх оскуолата (салайааччы А.Е Мучин) көмүскээтилэр.
Түмүккэ Мира Ефимова уруһуйга уонна живописька бастакы миэстэлэри, Уйгууна Алексеева живописька уонна дизайн композициятыгар 1-кы миэстэлэри (салайааччы СӨ култууратын туйгуна А.М.Константинова), Ребекка Яковлева Улуу Кыайыы 80 сылын көрсө үлэтэ (салайааччы СӨ култууратын туйгуна А.Г.Необутов) 1-кы миэстэни, М.Е.Попов аатынан Аллараа Бэстээх орто оскуолатын үөрэнээччитэ Диана Атагулова архитектурнай композицияҕа 1-кы миэстэни (салайааччы А.Е.Мучин) ылары ситистилэр.
Прасковья Назарова.
