Аллараа Бэстээххэ киинэ көрөр саала арылынна

Алтынньы 22 күнүгэр Аллараа Бэстээх бөһүөлэгэр В.В.Местников аатынан култуура сайдыытын киинигэр саҥа «Үбүлүөйдээх» диэн ааттаах киинэ көрөр саала арылынна.

Бөһүөлэк баһылыга Юрий Колмаков, киинэ саалатын партнера, «Сахафильм» судаарыстыбаннай национальнай киинэ хампаанньатын салайааччыта Алексей Егоров, киинэ режиссера Константин Тимофеев, киинэ артыыһа, режиссера Дьулусхан Андросов, сценарист, режиссер, СӨ култууратын туйгуна Алексей Амбросьев, артыыс, продюсер, СӨ ыччат бэлиитикэтин туйгуна Степан Порядин, биир дойдулаахпыт эдэр артыыс Василий Бурцев, СӨ култууратын үтүөлээх үлэһитэ, ССРС кинематографиятын туйгуна Нина Никанорова үөрүүлээх быһыыга-майгыга кыттыыны ыллылар уонна Аллараа Бэстээх олохтоохторун, култуура сайдыытын киинин кэлэктиибин эҕэрдэлээтилэр.

Саҥа култуура эбийиэгэр Аллараа Бэстээх бөһүөлэгэр 1982-1992 сылларга Владимир Федосеевич Пугачев салайан үлэлэппит «Үбүлүөйдээх»  киинэ саалатын аата ананна. Уопсайа 47 миэстэлээх, билиҥҥи кэмҥэ толору эппиэттиир саала буолар.

Юрий Колмаков, Алексей Егоров уонна В.В.Местников аатынан култуура сайдыытын киинин дириэктэрэ Ирина Назарова ытыс тыаһын доҕуһуолунан аалай лиэнтэни быстылар, бастакы көрөөччүлэр киинэ саалатыгар киирдилэр.

Бу күнтэн култуура сайдыытын киинин кэлэктиибэ бөһүөлэк, улуус олохтоохторун, ыалдьыттарын саҥа киинэ саалатыгар кэлэллэрин эрэнэ, үөрэ күүтэллэр.

 

Иван Лукин.