Үүнэр-сайдар кэскиллээх олох таһымын биир сүрүн туоһутунан хаачыстыбалаах мэдиссиинэ өҥөтө буолар. Сайдыылаах олоҕу кытта тэҥҥэ хардыылыыр толору хааччыллыылаах балыыһалар тыа сиригэр тутуллан нэһилиэнньэ чэгиэн туругун, сарыаллаах сарсыҥҥытын түстүүллэр.
Аныгы тутууларынан үксүү, чэлгийэ-чэчирии турар Аллараа Бэстээх бөһүөлэгэр саҥа балыыһа үлэлээбитэ ый буолла. Дойду бэрэсидьиэнэ Владимир Путин көҕүлээһининэн ыытыллыбыт «Уһун уонна көхтөөх олох» национальнай бырайыагынан тутуллубут икки мэндиэмэннээх, 1200 кв. миэтэрэттэн тахса иэннээх тупсаҕай эбийиэккэ аныгы мэдиссиинэ кыаҕын толору туһанар усулуобуйа тэрилиннэ. Олохтоохтор сырдык, ыраас, киэҥ-куоҥ саҥа балыыһаҕа электроннай сурутуунан уочарата суох көрдөрүнэн, доруобуйаларын бөҕөргөтүнэн саҕалаатылар.
Маҥнайгы этээскэ оҕо бырааһа, терапевт, гинеколог, стоматолог, суһал көмө, лаборатория, күнүскү стационар кииннэммиттэр, иккис этээскэ 15 куойкалаах терапевтическай отделение үлэтин саҕалаабыт. Балыыһа чинчийэр, эмтиир үрдүк хаачыстыбалаах, аныгы оборудованиенан, миэбэлинэн, көмпүүтэр тиэхиньикэтинэн толору хааччыллыбыт.
Салайааччылартан, үлэһиттэртэн уонна ыарыһахтартан саҥа тутуу туһунан санааларын туоһуластыбыт.
Иннокентий Павлов, Мэҥэ Хаҥалас улууһун кылаабынай бырааһа:
-Саҥа балыыһабыт Владимир Путин көҕүлээһининэн үлэлиир национальнай бырайыагынан 2015 сылтан былааннанан олоххо киирбит эбийиэк буолар. Амбулаторияҕа күҥҥэ 75 киһи көрдөрүнэр кыахтанна, үс терапевт, үс педиатр быраас үлэлиир. Стационарга Аллараа Бэстээх нэһилиэнньэтин тэҥэ Павловскай, Хаптаҕай, Ороссолуода олохтоохторо эмтэниэхтэрэ. Нэһилиэнньэҕэ өрүү тоҕоостооҕунан биллэр стоматолог, гинеколог быраастар ыарыһахтары көрөн саҕалаатылар. Аныгы чинчийии, оборудование көмөтүнэн үлэ таһыма өссө үрдүө диэн бүк эрэнэбит. Саҥа балыыһа аныгы олоххо тутуу таһыма үрдээбитин туоһулуур. Онон дойдубут бэрэсидьиэнигэр, өрөспүүбүлүкэбит Ил Дарханыгар Айсен Николаевка, улууспут дьаһалтатыгар махталбытын биллэрэбит.
Евгения Захарова, балыыһа сэбиэдиссэйэ:
-Саҥа балыыһа тутуллуута улууспут олоҕор, дьонугар-сэргэтигэр, мэдиссиинэ үлэһиттэригэр суолталаах, үрдүк үөрүүлээх түгэн буолар. Кэлэктииппит 40 үлэһиттээх, 9 быраастаахпыт. Ыарыһахтарбытын аныгы усулуобуйаҕа көрөр-истэр, эмтиир кыахтаммыппытыттан олус үөрэбит. Балыыһаҕа оҕолор, улахан дьон аныгы аппарааттарга чинчийиини ааһан тустаах көмөнү тута ылар кыахтаннылар. Ол курдук стоматолог быраас портативнай рентген аппараатынан тииһи устан ыарыыны иһиттэн көрөн эмтиир. Гинеколог быраас кольпоскоп диэн оборудованиенан матка шейкатын чинчийэр, искэн ыарыыны эрдэтинэ билэр-көрөр кыахтанна. Ыарыһахтар регистратураҕа туруоруллубут инфомат нөҥүө электроннай уочаракка суруйтарыахтарын, сайтарга киириэхтэрин сөп. Саҥа стационар анаан оҥоһуллубут табыгастаах оронунан, миэбэлинэн, медиги тута ыҥырарга туһуланар смарт-чаһынан хааччылынна.
Наталья Петрова, эдэр ийэ:
-Саҥа балыыһаҕа тохсунньу ыйтан көрдөрө сылдьабыт. Сырдык, ыраас, сылаас, оҕону көрдөрөргө олус табыгастаах. Электроннай уочараты, киэҥ-куоҥ саалалары биһирээтибит. Быраастарбыт ыарыһахтарга истиҥ сыһыаннаахтар, кыһамньылаахтык үлэлииллэр. Эргэ балыыһа саахалланар туруктаах, тымныы этэ. Онон бөһүөлэкпит саҥа тутууларынан сайда турарыттан олохтоохтор үөрэбит.
Екатерина Павлова, Хаптаҕай:
-Саҥа балыыһа терапевтическай отделениетыгар киирэн эмтэнэ сытабын. Аҕам саастаах көлүөнэ бу курдук дьон, норуот, кэнчээри ыччат туһугар үлэлиир тутуу бырагыраамаларыттан олус үөрэбит, салайааччыларбытыгар махтанабыт. Балыыһа аныгы мэхэньиисимнээх оронноро, миэбэлэ ыарыһах бэйэтин көрүнэригэр олус табыгастаах. Уопуттаах быраастарга, үтүө санаалаах сиэстирэлэргэ кыһамньыларын, идэлэригэр бэриниилээх үлэлэрин иһин махтанабын.
Изабелла Романова.
