Александр Кычкин сырдык аатыгар хоккейга күрэхтэстилэр

Иккис сылын «Манчаары» хоккейнай кулууп тэрийэр күрэхтэһиитин кыайыылааҕынан тахсан улуус чулуу хоккеиһын Александр Кычкин сырдык аатын сүгэр куубак хаһаайынынан В.П.Ларионов аатынан Майа орто оскуолатын хамаандата буолла.

Кулун тутар 25 күнүгэр Майа сэлиэнньэтигэр «Удьуор утумун» сылынан оскуола оҕолорун ортотугар хоккей көрүҥүн тарҕатар, сайыннарар, спортивнай маастарыстыбаларын үрдэтэр сыаллаах «Манчаары» хоккейнай кулууп күрэхтэһиитэ буолла. Улуус чулуу хоккеиһын Александр Кычкин сырдык аатын сүгэр куубак иһин сыллата тэриллэр тэрээһиҥҥэ В.П.Ларионов аатынан Майа орто оскуолата – Алеша Неустроев (8 «а»), Айсен Пестряков (9 «а»), Никита Пестряков (11 «б»), Игорь Неустроев (11 «б»), Эдик Лыткин (11 «б»), Ф.Г.Охлопков аатынан Майа орто оскуолата – Вася Шарин (9 «а»), Степа Баишев (9 «б»), Сандал Алексеев (9 «б»), Павел Борисов (9 «б»), Алгыстаан Григорьев (10 «а»), Вадим Никаноров (11 «б»), И.Г.Тимофеев аатынан Майатааҕы лиссиэй – Андрей Капитонов (10), Эрхан Осипов (11), Аман Лазарев (11), Мичил Габышев (11), Арсен Яковлев (11), Радимир Илларионов (11 кылаас үөрэнээччилэрэ) бастыыр иһин кииристилэр.

Эдэр кэскиллээх спортсменнары «Манчаары» хоккейнай кулууп чилиэннэрэ – Майа сэлиэнньэтин баһылыга Алексей Неустроев, баһылыгы бастакы солбуйааччы Дмитрий Игнатьев, ыччат, дьиэ кэргэн уонна успуорт бэлиитикэтигэр исписэлииһэ Егор Терентьев уонна Николай Барабанов эҕэрдэлээтилэр, күрэхтэһии быраабылаларын, онтон салгыы – хаамыытын иһитиннэрдилэр. Күрэхтэһии успуонсардарынан Тимофей Нестеров бэрэссэдээтэллээх сэлиэнньэ дьокутааттара уонна хоккейнай кулууп буоллулар.

Сааскы сылаас күн хамаандалар көхтөөх, тыҥааһыннаах, ыраас, чиэһинэй киирсиилэрин түмүгүнэн иккис сылларын бастакы миэстэ уонна көһө сылдьар куубак хаһаайынынан В.П.Ларионов аатынан Майа орто оскуолатын хамаандата буолла. Иккис миэстэҕэ И.Г.Тимофеев аатынан Майатааҕы лиссиэй хамаандата, үһүс – Ф.Г.Охлопков аатынан Майа орто оскуолатын хамаандалара таҕыстылар.

Маны тэҥэ анал ааттар туһааннаахтарынан буоллулар: «Бастыҥ көмүскээччи» Никита Пестряков, «Бастыҥ баратаар» Павел Борисов, «Бастыҥ кимэн киирээччи» Радимир Илларионов, «Бастыҥ оонньооччу» Алеша Неустроев.

 

Иван Лукин.