Ыам ыйын 7 күнүгэр Майатааҕы «Кэнчээри» уһуйаан 12 бөлөҕүн бары иитиллээччилэрэ, үлэһиттэрэ уоттаах сэриигэ кыттыбыт, эйэлээх олох иһин олохторун толук уурбут хорсун буойуннары, фроҥҥа, тыылга үлэлээбит ытык кырдьаҕастарбытын, аймах-билэ дьоммутун өйдөөн-санаан, кинилэргэ сүгүрүйэн, махтанан туран, аалай кыһыл, күөх, маҥан өҥнөөх саардары күннээх ыраас халлааҥҥа өрө уунан, ураа хаһыынан параадка сэлэлээн хаамтылар.
Ыам ыйдааҕы тыаллыын хатыһан, тыллар күөх сааһы аҕалан бу ытык-бэлиэ күҥҥэ уһуйаан бэлэмнэнии бөлөҕүн оҕолоро «Уруй-айхал, бэтэрээннэргэ!» (Светлана Константинова тыла, дьүрүлэ) ырыаны дуораччы ыллаатылар. «Кустукчаан», «Сир симэхтэрэ» улахан бөлөх иитиллээччилэрэ Кыайыы туһунан хоһооннору аахтылар.
Салгыы оонньуур былаһааккаларынан оҕолорбут полвой куукунаҕа саллаат хааһытын амсайдылар.
Маннык дьоллоох олоххо куттал суоһаабатын, күннээх сири-дойдуну өстөөх буулаабатын! Ким да умнуллубат, туох да умнуллубат!
Сардана Аввакумова
