Бүгүн Майаҕа ураты күн үүннэ. Ыам ыйын 9 күнүгэр ып-ыраас халлааҥҥа күммүт уота сандаарыччы тыган, тыала суох уу-нуурал чуумпу күн туран, Улуу Кыайыы 80 үбүлүөйдээх сылын бэлиэтиир үөрүүлээх күнү долгуйа кэтэспит тыыл бэтэрээннэрэ, сэрии сылын оҕолоро сүргэлэрэ өссө көтөҕүлүннэ.
Бу күн тыыл бэтэрээннэрэ, сэрии сылын оҕолоро 8 оптуобуска олорсон тиийэн, сахалартан бастакы Сэбиэскэй Сойуус Дьоруойа Ф.К.Попов искибиэригэр миитиҥҥэ кытыннылар. Кинилэри волонтердар арыаллыы сырыттылар. Бэтэрээннэри Улуу Кыайыы күнүнэн эҕэрдэлээн Мэҥэ Хаҥалас улууһун баһылыга Дмитрий Тихонов, Ил Түмэн дьокутаата Андрей Находкин тыл эттилэр.
Аҕа дойду Улуу сэриитигэр Кыайыыны турууласпыт ытык дьоммутун кэриэстиир миитиҥҥэ И.Г.Тимофеев аатынан Майатааҕы лиссиэй Дьулусхан Сидоров салайааччылаах “Дохсун”, В.П.Ларионов аатынан Майа орто оскуолатын “Беркут” байыаннай-патриотическай кулууп (сал. Никандр Борисов), хамандыыр солбуйааччыта Александр Ефимов иитиллээччилэриниин кытыннылар.
Кыайыы Кыһыл Знамятын 9-с кылаас үөрэнээччитэ Роман Брызгалов хамандыырдаах 10-с кылаас үөрэнээччитэ Валерий Гермогенов тутан киирдэ, 10-с кылаас үөрэнээччитэ Ярослав Ксенофонтов, 11-с кылаас үөрэнээччитэ Никита Тимофеев ассистеннарынан буоллулар. Бочуоттаах караулга 8-с кылаас үөрэнээччитэ Аман Терентьев, 9-с кылаас үөрэнээччитэ Михаил Тарабукин турдулар. Эдэр байыастар, 8-с кылаас үөрэнээччитэ Гаврил Никитин хамандыырдаах, 9-с кылаас үөрэнээччитэ Дьулусхан Алексеев, 10-с кылаас үөрэнээччилэрэ Вадим Гермогенов, Алквиад Иванов Сэбиэскэй Сойуус Дьоруойа Ф.К.Попов пааматынньыгар кыһыл лиэнтэнэн курдуу баайыллан киэргэтиилээх веногу уурдулар.
Улуус баһылыга Дмитрий Тихонов, Ил Түмэн дьокутаата Андрей Находкин, нэһилиэктэр баһылыктара, бэтэрээннэрэ, ыалдьыттара Аҕа дойду Улуу сэриитин кыттыылаахтарыгар сүгүрүйэн, чаҕылхай кыайыыны уһансыбыт биир дойдулаахпыт, Дьоруой Ф.К.Попов пааматынньыгар сибэкки дьөрбөтүн уурдулар. Сэриигэ охтубут дьоруойдарбыт сырдык дууһаларыгар сүгүрүйэн курутуйуу мүнүүтэтигэр иһийии буолла.
Бу кэннэ оптуобустаах холуонна кыттыылаахтара, сэрии сылын оҕолоро Кыайыы монуменыгар тахсан албан ааттаах дьоруойдарга сүгүрүйэн сибэкки дьөрбөтүн уурдулар.
Айхал буоллун Улуу Кыайыыны аҕалсыбыт ытык дьоммутугар!
Марелла Баишева.
