Мэлдьэхси Суолатыгар бүгүн сүүс харахтаах дуобакка норуоттар икки ардыларынааҕы таһымнаах улахан күрэхтэһии буола турар.
Аан дойду дуобакка федерациятын бэрэсидьиэнинэн талыллан үлэлии сылдьыбыт биир дойдулаахпыт, билигин ФМЖД уонна Саха Өрөспүүбүлүкэтин дуобака федерациятын бочуоттаах бэрэсидьиэнэ Владимир Ильич Птицын көҕүлээһининэн маннык бөдөҥ тэрээһин ыытыллар.
Ыалдьыттыы кэлбит Дуобат ассоциациятын Бүтүн аан дойдутааҕы (ИДА) бэрэсидьиэнэ Юрий Черток, Арассыыйа дуобакка федерациятын вице-бэрэсидьиэнэ Алексей Сонин, норуоттар икки ардыларынааҕы гроссмейстер, Арассыыйа биир күүстээх оонньооччута Сергей Белошеев, СӨ дуобакка вице-бэрэсидьиэнэ, норуоттар икки ардыларынааҕы гроссмейстер Иван Токусаров Суолаҕа айаннаан иһэн Майаҕа Манчаары Баһылай аатынан успуорт комплекска сылдьан И.Т.Васильев аатынан успуорт Албан аат мусуойугар ыалдьыттаатылар.
Манчаары XXII оонньууларыгар бэлэмнэнэ сылдьар остуол оонньуутугар улууспут сүүмэрдэммит хамаандатын дьарыгын сэҥээрдилэр, хабылыгы уонна хаамысканы оонньоон көрдүлэр.
Владимир Птицын быйыл 75 үбүлүөйдээх сааһыгар анаан тахсыбыт “Быть финансистом – судьба моя” кинигэтин мусуойга бэлэхтээтэ.
Афанасий Илларионов.
