Бүгүн, кулун тутар 25 күнүгэр, саха Комсомола төрүттэммит күнүгэр, Майа сэлиэнньэтин Комсомольскай болуоссатын тупсарыыга туһуланар аахсыйа тэрилиннэ. Олохтоохтор 14 чаастан “Дьол түһүлгэтэ” уопсастыбаннай кииҥҥэ буолбут аахсыйаҕа бэрт көхтөөхтүк кытыннылар.
Аахсыйаҕа Майа сэлиэнньэтин түмсүүлэрин кыттыылаахтара, тэрилтэлэр бэтэрээннэрин сэбиэттэрэ, түөлбэлэр, уопсастыбанньыктар, Майа оскуолатын араас сылларга бүтэрбиттэр бөлөхтөрө, биирдиилээн дьон утум-ситим кэлэн бэйэлэрин кылааттарын киллэрдилэр.
Маны сэргэ дьоруойбут Кеша Алексеев дойдутуттан Хаптаҕайтан анаан-минээн нэһилиэк бэтэрээннэрин сэбиэтин бэрэссэдээтэлэ Анастасия Кривошапкина уонна кыраайы үөрэтээччи Зинаида Игнатьева кэлэн кыттыыны ыллылар, нэһилиэк олохтоохторун уонна дьаһалтатын аатыттан уу харчынан көмөлөрүн туттардылар. Кинилэр хаптаҕайдар бу аахсыйаҕа салгыы кытталларын туһунан иһитиннэрдилэр.
Бэтэрээннэр улуустааҕы сэбиэттэрин бэрэссэдээтэлэ Евдокия Решетникова:
— Биһиги, Егоровтар дьиэ кэргэн, Майа олохтоохторо буолабыт, оҕолорбут манна улааппыттара. Бу болуоссакка оҕолор, ыччаттар таптаан сынньанар сирдэрэ. Болуоссаппыт инникитин өссө тубустун диэн туран, быйыл Майаҕа Төрүччү сыла биллэриллибитинэн, дьиэ кэргэн аатыттан бэйэбит сэмэй кылааппытын киллэрэбит, — диэн бэйэтин көмөтүн хамыыһыйаҕа туттарда.
«Таптыыр Майабыт тупсарын туһугар, көлүөнэ ситимэ бөҕөргүүрүн, үүнэр көлүөнэ дойдутун устуоруйатын билэ улаатарын туһугар инникитин да биир санаанан салайтаран үлэлиэҕиҥ-олоруоҕуҥ,» — диэн истиҥ санаатын «Түмэн» уопсастыбаннай холбоһук салайааччыта Мария Лукина тиэртэ.
Киэһэ 18 чааска аахсыйа түмүгүнэн 415900 солкуобай хомуллубутун туһунан ааҕар-суоттуур хамыыһыйа иһитиннэрдэ.
Уопсастыбанньыктар, аахсыйаҕа кыттыбыт дьон-сэргэ бары сүргэлэрэ көтөҕүллэн туран, Улуу Кыайыы 80 сыллаах өрөгөйдөөх күнүн көрсө сэлиэнньэбит кэрэ көстүүлэнэрин, тупсарын-киэркэйэрин туһугар бары күүспүтүн түмүөҕүҥ, өрө тардыныаҕыҥ диэн биир дойдулаахтарын маннык тэрээһиннэри өйүүллэригэр ыҥырдылар.
Февронья ОХЛОПКОВА.
