Сандал сааспыт маҥнайгы бырааһынньыгын – Аан дойду Дьахталларын күнүн көрсө Майа сэлиэнньэтин күүстээх аҥаардара олохпут чэчиктэригэр, далбардарыгар, күн-күбэй ийэлэргэ, килбик кийииттэргэ, сайаҕас саҥастарга, эйэҕэс эбэлэргэ анаан “Тапталбын ырыанан хоһуйан” диэн ылбаҕай ырыаларынан улахан кэнсиэри бэлэхтээтилэр.
Д.Ф.Ходулов аатынан култуура киинин саалатын толору кэлбит көрөөччүлэри Майа сэлиэнньэтин баһылыга Алексей Неустроев эҕэрдэлээтэ. Кини кэрэ аҥаардарга “Куруутун олохпутун үөрүүнэн сырдатыҥ, үүнэр ыччаппытыгар бастыҥ холобур буола туруҥ” диэн алгыһын анаата уонна норуот бэйиэтэ Семен Данилов “Бу тыллар буолбатах – кубалар” диэн кинигэтиттэн далбар хотуннарга аналлаах хоһоонун доргуччу аахта. Баһылык сэлиэнньэ сайдыытыгар сүҥкэн көмөнү оҥорор түөлбэлэр салайааччыларыгар махтанан туран кулун тутар 8 күнүгэр буолаары турар Сиэйэ Уола Айыллыата Дьырылыат уонна Кылаан Кындыл айар түһүлгэлэригэр билиэттэри бэлэхтээтэ итиэннэ сибэкки дьөрбөтүн туттарда.
“Мэҥэбил” эр дьон ырыа ансаамбыла, сыана бэтэрээнэ Спиридон Григорьев, ааспыт сылга “Эн – Сулускун” ырыа күрэҕин кыттыылаахтара Степан Копырин, Егор Федоров, РЭС үлэһитэ Еремей Захаров, Лоомтукаттан дьүрүлдьүт уонна ырыаһыт Леонид Винокуров, ырыаһыттар Владислав Макаров, Алексей Слепцов – Атасхаан, Николай Васильев – Айтамыл, о.д.а. иэйиилээх ырыаларынан көрөөччү сүрэҕин сүүйдүлэр. М.К.Попова аатынан Майатааҕы муусука ускуустубатын учуутала Даниил Алексеев байааҥҥа дьүһүйүүлэрэ куппутун тутта. Көрөөччүлэр бырааһынньык долгунугар уйдаран, тэҥҥэ ыллаһа олордубут.
Эр дьон эҕэрдэ кэнсиэрин Төхтүртэн сынньалаҥ киинин исписэлииһэ Алексей Говоров иилээн-саҕалаан сэргэхтик ыытта.
Мэлдьи дурда-хахха, күүс-көмө, эрэллээх эркин буолар күүстээх аҥаардарбытыгар үөрүүбүтүгэр үөрүү бэлэхтээн сүргэбитин көтөхпүттэригэр ис сүрэхтэн махтанабыт.
Марелла Баишева.
