Ороссолуода нэһилиэгэр бэс ыйын 25 — от ыйын 7 күннэригэр «Беркут» байыаннай-патриотическай лааҕыр арыллан үлэлиир.
Лааҕыр оҕолору дойдуга бэриниилээх буола улааталларыгар, инники сыалларын-соруктарын ситиһэргэ иитэр-үөрэтэр, эттэрин-хааннарын чэбдигирдэр сыаллаах үлэлиир.
Быйыл В.П.Ларионов аатынан Майа орто оскуолатын «Юнармия» кылааһын 15 үөрэнээччитэ сезон устата байыаннай бэлэмнэниини ааһыахтара. Оҕолору оскуола учуутала Никандр Борисов уонна оскуола выпуснига, «ЮнАрмия» кылааһын үөрэнээччитэ Варвара Романова дьарыктыыллар.
Никандр Борисов, лааҕыр иитээччитэ:
– Күммүт 7:30 чаастан сэрээккэттэн саҕаланар. Сарсыардааҥы аһылык кэннэ оҕолор байыаннай дьарыктарынан арахсан үөрэнэллэр. Маны тэҥэ лааҕыр үлэтигэр «Снежный барс» байыаннай-спортивнай күрэхтэһиигэ бэлэмнэнии киирэр. Оҕолор манна сөбүлээн сылдьаллар. Күн аайы ыарырҕаппакка саҥаттан саҥаны билэллэр, билиигэ-көрүүгэ талаһаллар, – диэн иһитиннэрдэ.
Иван Лукин.
