Дойду үрдүнэн бары оскуолалар саҥа үөрэх дьылынан ааннара тэлэччи аһылынна. Бырааһынньыктыы киэргэммит оскуолаҕа маанытык таҥныбыт оскуолаларын, доҕотторун, учууталларын ахтыбыт, ол быыһыгар оскуола боруогун саҥа атыллыыр кырачаан үөрэнээччилэр төрөппүттэринээн үөрэ-көтө муһуннулар.
Бырааттыы Пономаревтар ааттарынан Томтор оскуолатыгар эмиэ сүүрүү-көтүү, долгуйуу… Бырааһынньыктыы киэргэтиллибит оскуола заалыгар оҕолор, учууталлар, төрөппүттэр муһуннулар.
Үөрүүлээх күн буоларын курдук оскуола дириэктэрэ Николай Свинобоев эҕэрдэ тылынан саҕаланна, дойду үрдүнэн буола турар балаһыанньанан, эйэлээх олох туһугар анал байыаннай дьайыыга кытта сылдьар биир дойдулаахтарбытыгар этэҥҥэ буолууну баҕарда, бары кытта сылдьан олохторун толук уурбут байыаннай дьайыы кыттыылаахтарын, ол иһигэр бу оскуола выпускнига Сергей Яковлев ааттарын ахтан санаан ааһан биир мүнүүтэлээх иһийии буолан ааста.
Николай Николаевич быйылгы выпускниктар бары бэйэлэрэ талан ылбыт идэлэригэр, орто анал уонна үрдүкү үөрэх тэрилтэлэригэр киирбиттэрин бэлиэтээтэ уонна саҥа выпускниктарга үөрэхтэрин ситиһиилээхтик бэлэмнэнэн бары экзаменнарын этэҥҥэ туттаралларыгар баҕарда.
Билии күнүнэн, үөрэх дьыла саҕаламмытынан олохтоох дьаһалта баһылыга Мирон Свинобоев, улуустааҕы үөрэх управлениетыттан «Кэскил» киин дириэктэрэ Матрена Птицына, улуустан гражданскай оборона начаалынньыга Софрон Софронов кыттыыны ыллылар, оҕолору эҕэрдэлээтилэр, баҕа санааларын тиэртилэр, бастакы кылааска киирэр оҕолорго бадаарактарын туттардылар. Мичээрэ уһуйаан аатыттан выпускниктарын Нюргуяна Холмогорова эҕэрдэлээтэ. Быйыл бастакы кылааска икки оҕо киирдэ. Оҕолору үрдүкү категориялаах учуутал Феврония Гаврильевна Оконешникова сиэтэн киллэрдэ. Оскуолаҕа киирэр үөрэнээччилэргэ, анал байыаннай дьайыы кыттыылаахтарын оҕолоругар, бырааһынньыкка кэлбит ветеран учууталларга профсоюз аатыттан Оксана Сергеева эҕэрдэлээн, бадаарактары туттартаата. Бүтүн Арассыыйатааҕы аахсыйаҕа кыттан 11-с кылаас үөрэнээччилэрэ «Самолетик будущего» бэлэхтээтилэр.
Сылын аайы түөлбэлэригэр оскуолаҕа киирэр кырачааннары олохтоохтор эҕэрдэлиир үгэстээхтэр. «Аартык» түөлбэттэн салайааччы Мария Свинобоева, «Кэскил» түөлбэттэн Степан Павлов эҕэрдэлээн бадаарактарын туттардылар. Бырааһынньык алтан чуораанын оскуола выпускницата Саина Заровеяева, саҥа үөрэнээччилэр Афоня Терентьев, Иван Борисов лыҥкыначчы тыаһатан кылааска ыҥырыыларынан, уопсай хаартыскаҕа түһүүнэн түмүктэннэ.
Прасковья Местникова
