Анал байыаннай дьайыы кыттыылааҕын Семен Марков сырдык аатыгар мини-футбол күрэхтэһиитэ буолла

 

Алтынньы 31 күнүгэр Хара нэһилиэгэр В.М.Егоров аатынан «Чыпчаал» култуура-успуорт комплексын саалатыгар анал байыаннай дьайыы кыттыылааҕын, «Эр санаа» уордьан туһааннааҕын Семен Николаевич Марков – Маркиз кэриэһигэр аһаҕас мини-футбол күрэхтэһиитэ буолла.

Семен Марков Харатааҕы успуорт лиссиэйигэр 1999 сыллаахха маҥнайгы кылааска үөрэнэ киирбитэ. Үөрэнэр кэмигэр көҥүл тустуунан дьарыктаммыта. “Инникигэ хардыы” научнай кэмпириэнсийэлэргэ ситиһиилээхтик кыттара. 2009 сыллаахха оскуолатын бүтэрэн М.К.Аммосов аатынан Дьокуускайдааҕы судаарыстыбаннай университекка геолого-разведочнай факультетка туттарсан үөрэнэ киирбитэ. 2012 сыллаахха Хабаровскай куоракка тимир суол чааһыгар Арассыыйа армиятын кэккэтигэр сулууспалаабыта. Сулууспалаан кэлэн Алдан куоракка дуогабарынан ваахтаҕа үлэлээбитэ. Төрөөбүт нэһилиэгин олус таптыыра, ыччаттар бөлөхтөрүн актыыбынай кыттыылааҕа. Култуура уонна успуорт эстэпиэтэтин, нэһилиэккэ ыытыллар успуорт күрэхтэригэр солбуллубат кыттааччыта. Доҕотторо кинини олус өйүүллэрэ, убаастыыллара. Хара нэһилиэгиттэн биир бастыкынан 2022 сыл балаҕан ыйын 24 күнүгэр анал байыаннай дьайыыга быстах хомуурга бэбиэскэ тутан, төрөөбүт дойдум ыҥырар буоллаҕына мин барабын диэн хорсуннук айаҥҥа туруммута.

Холобур оҥостор Хара нэһилиэгин бастыҥ ыччатын Семен Николаевич аатын сүгэр тэрээһиҥҥэ Чурапчыттан «9 томтор» хамаанда, Амматтан «Дружба СК» хамаанда, Тааттаттан «Таатта», улуустааҕы киин балыыһа хамаандата, Майатааҕы «Мэҥэ МК», «Чөл Майа» хамаандалара, Хараттан – «Хара — I», «Хара — II», «Молодежь», «Пушкаш» хамаандалара футбол хонуутугар бастыҥ аатын былдьаһа муһуннулар.

Киэн туттар биир дойдулаахпытын чиэстии кэлбит спортсменнары эҕэрдэ тылынан Хара нэһилиэгин баһылыга Дария Назарова көрүстэ уонна Семен Марков төрөппүттэригэр Николай Николаевичка, Татьяна Александровнаҕа, бииргэ төрөөбүт эдьиийдэригэр Елизавета Шараповаҕа, Мария Сидороваҕа, аймахтарыгар махталын тиэртэ. Күрэхтэһии кыттыылаахтарыгар, ыалдьыттарыгар, тэрийээччилэригэр оҕотун олоҕун аҕата Николай Николаевич кэпсээтэ. 10 хамаандаҕа мини-футбол хаамыытын сүрүн судьуйа Серафим Терентьев сиһилии быһаарда.

Күрэхтэһии арыллар түгэнин «Күн оҕолоро» үҥкүү бөлөҕө эҕэрдэ үҥкүүтүнэн, Николай Васильев – Айтамыл ылбаҕай ырыатынан киэргэттилэр.

Уон хамаанда икки ардыгар көхтөөх, интэриэһинэй, тыҥааһыннаах оонньуу түмүгүнэн иккис миэстэни «Мэҥэ МК» хамаандата, үһүс миэстэни «Хара II» хамаандата ыллылар. Маҥнайгытын ыытыллыбыт Семен Марков аатын сүгэр мини-футбол күрэһигэр кыайыылааҕынан «Хара I» хамаанда таҕыста.

 

Елизавета Шарапова:

 

– Бүгүн бииргэ төрөөбүт быраатым Семен Николавевич Марков сырдык кэриэһигэр анаммыт мини-футбол күрэһэ сүрэхтэннэ. Ыраахтан-чугастан олус элбэх хамаанда кытта кэлбититтэн биһиги олус үөрэн, долгуйан турабыт.

Быраатым олус сырдык, үчүгэй санаалаах этэ. Футболунан кыра эрдэҕиттэн интэриэһиргиирэ. Табаарыстарын, кылааһынньыктарын кытта өрүү бииргэ оонньооччулар, олуһун диэн сэҥээрэр этэ.

Күрэхтэһиибит тэриллибитигэр нэһилиэк баһылыгар Дария Назароваҕа, олохтоох дьаһалта, «Айыллаан» култуура киинин кэлэктиибигэр, сүрүн судьуйаҕа Серафим Терентьевка, күүс-көмө буола сылдьар чугас аймахтарбар махталбын тиэрдэбин, – диэтэ.

 

Иван Лукин.