Нөөрүктээйи нһилиэгин И.П.Игнатьев – Кинигэ Уйбаан аатынан түмэлгэ Хомсомуол күнүгэр аналлаах ”Хомсомуолга биир күн” ыстаансыйаларынан оонньуу ыытылынна. Оонньууну оскуола 1979 сыллаах выпуһа, “Умсулҕан” коллекционердар түмсүүлэрэ, “Айылгы норуот айымньытын киинэ, Арчы дьиэтэ, түмэл тэрийэн ыыттылар.
Араас көлүөнэ комсомолецтар кэнчээри ыччакка дойдубут устуоруйатын биир сүрүн кэрчигин, ыччат түмсүүтүн, хомсомуол туһунан өйдөбүлү иҥэрэр сыаллаах тэрилиннэ. Оскуолабыт”Стимул” үрдүкү үөрэнээччилэрин оҕолорун түмсүүтэ (сал. С.З.Слободчикова, оҕолор сэбиэттэрин бэрэссэдээтэлэ Нарыйа Васильева) кэлэн көхтөөх кыттыыны ыллылар. Аҕыйах да кэм устатыгар хомсомуол эйгэтигэр киирэн таҕыстылар, элбэҕи биллилэр-көрдүлэр.
Тэрээһин комсомол гимнэ буолбут “Эн, комсомол – мин дьолум“ ырыанан саҕаланна. “Айылгы” норуот айымньытын киинин исписэлиистэрэ мустубут дьону эҕэрдэлээн ыллаатылар. Салгыы 5 ыстаансыйанан оонньуу саҕаланна. Бастакы ”Историческай” ‒ оскуола учуутала А.А.Дмитриева хомсомуол устуоруйатын туһунан викторина ыытта. Александра Андреевна улуус, өрөспүүбүлкэ биир чаҕылхай комсомолеһын, ”Үлэ Албан аат“ уордьан толору кавалерын, Ходороттон төрүттээх Андрей Дмитриевич Дмитриев туһунан сырдатта.
“Спортивнай” ыстаансыйаны оскуолабыт 70-с сыллардаах спортсмена С.Д.Яковлева ыытта. Ол кэмнэргэ үөрэнээччилэр переменаларга оригами техникатынан кумааҕынан оҥоһуллубут мээчиктэринэн оонньуурбут диир. Үөрэнээччилэргэ оҥотторон көрдөрдө, интэриэһиргээн оонньоотулар.
“Музыкальнай” ыстаансыйаны “Умсулҕан” коллекционердар түмсүүлэрэ олус сэргэхтик ыытта. 70-с сыллардаах комсомолкалар оскуолаҕа, биэчэрдэргэ кэппит таҥастарын оҕолорго кэтэрдэн көрдөрдүлэр. Проигрыватель холбоон пластинкалары тыаһатан иһитиннэрдилэр, үҥкүү хамсаныыларын көрдөрдүлэр. Маассабай ооньуулартан “Шахта” диэн көрүҥү оонньоттулар.
“Трудовой“ ыстаансыйаны Н.И.Максимова салайан үлэлэттэ. Уолаттарга “Айылгы” үлэһитэ А.Бродников бөппүрүөк эрбиинэн бэрэбинэни эрбэттэрдэ. Арчы үлэһиттэрэ, С.Е.Садовникова, М.Н.Зыкова итии чэйинэн, алаадьынан күндүлээтилэр. Бу курдук Арчы дьиэтигэр оттуллар кыстык мас бэлэмнэннэ.
Бүтэһик ыстаансыйа – “Пресс-киин”. Ю.Е.Колосова, И.И.Никанорова ыыттылар. Оҕолорго урукку истиэнэ хаһыаттарын көрдөрдүлэр. Плакат бөрүөтүнэн тушь кыраасканан хайдах суруйалларын билиһиннэрдилэр. Бэтэрээн учууталбыт Н.Д.Михайлова суруйан көрдөрдө. Плакатка суруйбут тушь 1986 сыллаахха оҥоһуллубутун, И.П. Игнатьев архыыбыгар баарын оҕолор сөхтүлэр. “Больше дела, меньше слов” диэн комсомолецтар өрүү девиз оҥостубут өс хоһооннорун плакакка суруйдулар. Бу курдук олус интэриэһинэй тэрээһин буолан ааста. Комсомолецтар, үөрэнээччилэр да бииргэ алтыһан дуоһуйа сынньаннылар.
Юлия Колосова, Наталья Максимова, Павловскай
