Мэҥэ Хаҥалас улууһун киин балыыһатын салалтата тэрилтэтин бэтэрээннэрин өрүү өйүүр, көмөлөһөр.
Кылаабынай быраас Иннокентий Егорович Павлов, биир идэлээхтэрин сойууһун бэрэссэдээтэлэ Иван Гаврильевич Пивоваров, техническэй киинтэн Павел Павлович Дмитриев көҕүлээһиннэринэн киин балыыһа сүүрбэччэ үлэһит эр дьоно бу күннэргэ муус ылыытыгар субуотунньуктаатылар. Маннык субуотунньук доруобуйа харыстабылын бэтэрээннэригэр уонна анал байыаннай дьайыыга сылдьар биир дойдулаахтарбыт дьиэ кэргэннэригэр сыллата ыытыллан кэллэ.
Бүгүҥҥүттэн мууһу барыта 25 ыалга тиэйэн саҕалаатылар. Аҕам саастаахтар дэкээдэлэрин чэрчитинэн 75 бэтэрээҥҥэ оҕуруот аһынан көмө оҥорбуттара. Улуустарын «Эркээйи» хаһыатыгар биэстии бэтэрээҥҥэ сыллааҕы сурутууну бэлэх уунан кэллилэр. Бу барыта билиҥҥи уустук кэмҥэ улахан көмө, өйөбүл буолар.
Доруобуйа харыстабылын бэтэрээннэрин улуустааҕы сэбиэтин бэрэссэдээтэлэ Лариса Ефремовна Дмитриева киин балыыһа салалтатыгар, кэлэктиибигэр махтала улахан. Кини ыарахан уонна үрдүк эппиэтинэстээх үлэлээх тэрилтэтин бары үлэһиттэригэр үрдүктэн үрдүк ситиһиилэри, толкуйдаабыттара тобуллан, үлэлэрэ санаа хоту салаллан иһэригэр баҕа санаатын тиэртэ.
Марелла Баишева.
