Бырама орто сүһүөх оскуолатыгар 31 оҕо үөрэнэр. Төһө да оскуолабыт оҕото аҕыйаҕын иһин, оҕолорбут ситиһиилэрэ үөрэх да өттүгэр, успуорт да өттүтүгэр үгүс.
Биһиги нэһилиэкпитигэр улахан успуорт саалалаахпыт. Соҕотох саала буолан манна нэһилиэк ыччата эмиэ дьарыктанар. Туох баар улахан тэрээһиннэрбит, култуура уонна успуорт эстэпиэтэтэ барыта успуорт саалатыгар ыытыллар. Биһиги нэһилиэккэ улахан суолталаах уораҕайбыт. 2003 с. “Үтүө дьыала” бырайыагынан тутуллубута. Тутуллуоҕуттан тымныы буолан 2018 с. хапытаалынай өрөмүөн оҥоһуллубутун үрдүнэн, сылыйбатаҕа, өссө тымныйбыт курдук буолбута. Сылын аайы мунньахтарга оскуола салалтата туруорсара да, өрөмүөн ыытыллыбыт буолан бу боппуруос олох кыаллыбатаҕа, онтон ыла өрөмүөн диэн ыытыллыбатаҕа.
Быйыл күһүн улуус баһылыга Дмитрий Тихонов өйөбүлүнэн, успуорт саалатыгар 381800 суумаҕа утеплитель уонна изоспан ыларга үп-харчы көрүллүбүтэ. Оскуола салалтата эбии тутуу матырыйаалы ылаары нэһилиэнньэҕэ харчы хомуйуутугар ыҥырыы таһаарбыта. Дьон утары баран 72000 солк. көмө харчы хомуллубута. Бу харчы саморез, фанера, кырааска уо.д.а. кыра матырыйаалы ыларга туһанылынна.
Күн-дьыл үлэһит дьоҥҥо туран биэрэн, күһүммүт улахан ардаҕа суох буолан, улахан тымныылар түһүөхтэрин иннинэ нэһилиэнньэ эр дьоно, ыччаттар, оскуола үлэһиттэрэ, үөрэнээччилэр күргүөмүнэн үлэ бөҕөнү көрүстүлэр. Тас бүрүөһүнүн барытын көтүрэн эбии сылаас матырыйаалынан бүрүйдүлэр, ис-тас өттүттэн муостатыгар 5 бырысыап кэриҥэ буор кутулунна. Манан өрөмүөн үлэтэ бүппэт, өссө да ис өртүгэр үлэ үгүс. Ол эрээри саҕаламмыт үлэ түмүктэниэҕэ, билиҥҥи туругунан саамай улахан үлэтэ бүтэн, хайы-үйэ түмүгүн көрдөрдө. Былырыын баччаларга оҕолорбут физкултуура уруогар тоҥор буоллахтарына, быйыл тиритэбит дэһэллэрин истэр биһиэхэ улахан үөрүү. Инникитин да улахан тымныыларга сылааһын тутуоҕа диэн эрэлбит улахан.
Холгума нэһилиэгин аатыттан улууспут баһылыгар Дмитрий Тихоновка кыһалҕабытын өйдөөн, утары баран көмөлөспүтүгэр улахан махталбытын тиэрдэбит.
Татьяна Попова, бибилэтиэкэр
