Алтынньы 3 күнүгэр Дьокуускай куоракка СӨ култууратын үтүөлээх үлэһитэ, мелодист, быраас, учуонай Виталий Андросов төрөөбүтэ 75 сылыгар аналлаах «Дьиэрэй, ырыам!» доруобуйа харыстабылын үлэһиттэрин ортотугар ырыа куоҥкуруһугар Мэҥэ Хаҥалас үрүҥ халааттаах аанньаллара кыайыы көтөллөөх кытыннылар.
Мэдиссиинэ үлэһиттэригэр аналлаах ырыа түһүлгэтэ икки түһүмэхтээх буолла. Кыттааччылар Виталий Андросов ырыатын кэккэ сөбүлээбит көҥүл ырыаларын толордулар. Кэрэ эйгэтин күөнүгэр 22 солист уонна 7 ансаамбыл кытынна. Дьүүллүүр сүбэҕэ бэрэссэдээтэлинэн СӨ култууратын туйгуна Николай Андросов, чилиэннэринэн Виталий Андросов уола Дмитрий Андросов, мэдиссиинэ билимин доктора Виктор Игнатьев, СӨ култууратын үтүөлээх үлэһитэ Степан Васильев, эстрада ырыаһыта Дария Александрова үлэлээтилэр.
Мэдиссиинэ талба талааннаах үлэһиттэрин киэҥ хабааннаах куоҥкуруһун муҥутуур кыайыылааҕынан, «Гран-При» хаһаайынынан улуустааҕы киин балыыһа «Айыына» ырыа ансаамбыла буолла, салайааччы – Саргылаана Ефимова. Биирдиилээн толорооччуларга 1-кы истиэпэннээх дипломунан улуустааҕы киин балыыһа бырааһа Иннокентий Петухов наҕараадаланна.
Кыайыылаахтары итиитик-истиҥник эҕэрдэлиибит!
Изабелла Романова.
