Ыам ыйын 8 күнүгэр Улуу Кыайыы 81 сылыгар аналлаах «Ким да умнуллубат, туох да умнуллубат!» миитин ыытылынна.
Тэрээһин «Улуу Кыайыыны уһансыбыттара!» араадьыйа репортажтан, Тараҕай нэһилиэгин олохтоохторун, үлэһит кэлэктииптэрин сэлэлии хаамыытынан, Кыайыы параадынан саҕаланна.
Нэһилиэк баһылыга Юрий Порядин, тыыл, үлэ бэтэрээнэ, Мэҥэ Хаҥалас улууһун, Тараҕай нэһилиэгин Бочуоттаах олохтооҕо, СӨ тыа хаһаайыстыбатын бэтэрээнэ, «Улууска тыа хаһаайыстыбатын сайдыытыгар кылаатын иһин» бэлиэ хаһаайына, ытык кырдьаҕас Николай Иванов эҕэрдэ тылларын эттилэр. Бүгүҥҥү күҥҥэ долгутуулаах түгэнинэн байыаннай дьайыы кыттыылаахтарын, уолаттарбыт көмүс ааттарын үйэтитэр «Буойун аата үйэлэргэ тыыннаах!» пааматынньык арыллыыта буолла. Түгэнинэн туһанан пааматынньык оҥоһуллан тахсарыгар үбүлээбит, күүс-көмө буолбут биир дойдулаахтарбытыгар, Табаҕа орто оскуолатын 1966 с. бүтэрбит үбүлүөйдээх выпустарыгар, ону тэҥэ оҥорон таһаарбыт маастарбытыгар Виталий Саввиҥҥа үйэлээх, дириҥ ис суолталаах өйдөбүнньүк бэлиэҕит иһин нэһилиэкпит олохтоохторун ааттарыттан улахан махталбытын тиэрдэбит.
Хорсун буойуммут, байыаннай дьайыы кыттыылааҕа Алексей Дмитриевич Филиппов Ийэ дойдутугар ытык иэһин төлүү сылдьан сэрии толоонугар олоҕун толук уурбута. Дойду бэрэсидьиэнэ Владимир Путин илии баттааһыннаах «ЭР САНАА УОРДЬАНА» (ОРДЕН МУЖЕСТВА) наҕараадатын Алексей төрөппүттэригэр Анастасия Юрьевна, Дмитрий Алексеевич Филипповтарга туттарылынна. Салгыы үүнэр көлүөнэ ыччаттарын ааттарыттан «Өйдөбүнньүк уотугар» венок ууруута, тохтобул мүнүүтэтэ биллэрилиннэ.
«Кэскил» оҕо уһуйаанын кэлэктиибэ сылын ахсын ыытыллар «Саллаат хааһыта» аахсыйаҕа кыттыһан, нэһилиэкпит дьонун-сэргэтин урукку кэми санатан гречка хааһынан күндүлээтилэр.
Киэһэтин Капиталина уонна Иван Бурнашевтар ааттарынан сынньалаҥ кииҥҥэ бэтэрээннэрбитин кытта көрсүһүү, бырааһынньыктааҕы сандалы, эҕэрдэ тыллар этилиннилэр, Махтал суруктар туттарылыннылар.
Олохтоох бибилэтиэкэҕэ «Уруйдуубут Улуу Кыайыыны!» кинигэ быыстапката туруорулунна. Нэһилиэкпит айар талааннаах, дьоҕурдаах кэлэктииптэрэ кыттыылаах, сынньалаҥ киин исписэлииһэ Тускул Егоров туруоруутугар, «Төннүөм Кыайыы кынаттаах!» мюзикл көрдөрүлүннэ, «Өйдөбүнньүк чүмэчи» аахсыйаҕа көхтөөх кыттыыны ыллыбыт.
Ким да умнуллубат! Туох да умнуллубат! Кыайыыны ситиспит хорсун-хоодуот санаалаах буойуннарга, сэрии, тыыл бэтэрээннэригэр, билигин буола турар байыаннай дьайыы кыттыылаахтарыгар хоолдьуктаах бэйэбит хоҥкуйан, сүһүѳхтээх бэйэбит сүгүрүйэн туран кинилэр үрдүк ааттарыгар барҕа махтал тылларын аныыбыт! Кинилэр, кѳҥүл туһугар охсуспут кэскиллээх дьыалалара биһиги ѳйбүтүгэр-санаабытыгар сырдык сулус буолан, хас биирдии саха саллаатын сырдык мөссүөнэ, албан аата, айар-тутар төрөөбүт дойдубут эдэр дьонун өйүгэр-санаатыгар, сүрэҕэр-быарыгар хаһан да умнуллуо суоҕа!
Бибилэтиэкэр Туяра Михайлова
