Нөөрүктээйи нэһилиэгэр кулун тутар 28 күнүгэр Игнатьев И.П.- Кинигэ Уйбаан аатынан түмэлгэ айар куттаах дьоммутун сырдатар тэрээһин буолан ааста.
Ол курдук, тыыл, үлэ, сыана бэтэрээнэ, СӨ үтүөлээх рационализатора, “Мастер-умелец прикладного искусства Мегино-Кангаласского улуса” бэлиэ хаһаайына, “Играй, гармонь” ансаамбыл чилиэнэ, Нөөрүктээйи нэһилиэгин норуотун маастара Владимир Васильевич Габышев уонна тыыл, үлэ бэтэрээнэ, “Мастер-умелец прикладного искусства”, «Мастер народных художественных промыслов РС (Я)» бэлиэлэрдээх, Саха Өрөспүүбүлүкэтин, Нөөрүктээйи нэһилиэгин, Мэҥэ Хаҥалас улууһун норуот маастара, “Играй, гармонь” ансаамбыл чилиэнэ Анна Алексеевна Ноговицына ‒ «Нөөрүктээйи нэһилиэгин ытык ыала“ бэлиэ хаһаайыннара айар үлэлэрин быыстапката арылынна.
Дьиэ кэргэн аҕа баһылыга Владимир Васильевич Габышев айылҕаттан айдарыылаах дэгиттэр талааннаах этэ. Идэтинэн суоппар, уһун сылларга Приленскэй МПМК-ҕа суоппарынан, сварщигынан үлэлээбитэ. Илии үлэтин чэпчэтэр араас тэриллэри оҥорбута. Владимир Васильевич – мындыр рационализатор. От охсордоох, сухалаах, тэлиэгэлээх 3 тыраахтары таҥан оҥорбута. Кэнники тыраахтара өрөспүүбүлүкэтээҕи үбүлүөйдээх быыстапкаҕа бастаан мэтээлинэн наҕараадаламмыта. Маһынан, тимиринэн уһанарын сөбүлүүрэ. Оҥоһуктара быыстапка аайы туран лауреат, дипломант буолаллара. Уус-уран самодеятельность актыыбынай кыттыылааҕа. Гармошкаҕа, аккардиоҥҥа оонньуура. Нөөрүктээйигэ кырыымпа бастакы маастара буолар. Бэйэтэ оҥорбут кырыымпатыгар оонньоон эстэпиэтэҕэ сыл аайы лауреат аатын сүгэрэ.
Анна Алексеевна ‒ улахан дьиэ кэргэн Далбар Хотуна, Уус Алдан оройуонуттан төрүттээх. Идэтинэн бэрэдэбиэс, Павловскай бөһүөлэгин 59 №-дээх бородуукта маҕаһыыныгар бэрэдэбиэһинэн биэнсийэҕэ тахсыар диэри үлэлээбитэ. Бочуоттаах сынньалаҥҥа тахсан баран иистэнэр буолбута. Сүрүн ииһэ ‒ сахалыы таҥастар. Анна Алексеевна былыргы өбүгэлэрбит кэппит оноолоох соннорун тигэн өрөспүүбүлүкэҕэ хас да сыл бастакы, иккис истиэпэннээх дипломнарынан наҕараадаламмыта. Ол курдук 80 сааһыгар кытыылаах сон комплегын тигэн Үс Хатыҥҥа ыһыахха кыттан “Саха талба мааны таҥаһа” анал ааты туттарбыттара.
Кэргэнинээн Владимир Васильевичтыын 4 оҕолонон, 57 сыл бииргэ дьоллоохтук олорбуттара.
Айар куттаах Габышевтар дьиэ кэргэттэригэр анаан бу бэлиэ күн анал стендэ арылынна. Тэрээһиҥҥэ Габышевтар дьиэ кэргэн оҕолоро, сиэннэрэ, хос сиэннэрэ, аймах-билэ дьоно, улуус, нэһилиэк дьаһалтата, уопсастыбанна түмсүүлэр кыттыыны ыллылар. Ытык саастаах кырдьаспытыгар Анна Алексеевнаҕа махтал тылларын эттилэр. “Айылгы” норуот айымньытын киинин исписэлиистэрэ “Кыл кырыыма“ бөлөх кырыымпаҕа оонньоон эҕэрдэлээтилэр.
Кэнники сылларга кырыымпаны оҥорууга эдэр ыччаттарбыт сыстан үлэлэһэн эрэллэрин астына бэлиэтиибит. Оскуолабыт учуутала, архитектор идэлээх Владимир Дмитриев, фольклорист, эбии үөрэхтээһин педагога, Тиксиигэ олорор Ксения Шамаева үлэлэһэллэр. Бу күн Владимир Николаевич бэйэтэ оҥорбут кырыымпатын түмэлгэ бэлэх уунна.
Айар куттаах Ытык ыаллар Владимир Васильевич уонна Анна Алексеевна талааннара ыччаттарыгар бэриллэн, сайдан истин.Эдэр ыччакка үтүө холобур буола турдуннар.
Юлия Колосова, Наталья Максимова, Павловскай.
